Chief Minister Lalduhoma’n thlai thar pali lei tura mipuia an intiam zingah hmunphiah hring a tel lo tih house a hrilh.
Vawiina Assembly Budget session-a hmunphiah lei chungchanga harsatna awm a sawifiahnaah Chief Minister chuan, thlaithar pali lei turin an intiam a, a rate pawh mipuiah an puan thu sawiin hmunphiah hring erawh chu an telh lo hrim hrim a, an telh ngai dawn lo niin a sawi a, thlai thar lei chungchang chu Budget session zawh financial year thar atanga an tih tura an puan a nih thu a sawi bawk.
Lalduhoma chuan thuneihna an chan hlim khan sorkar hmasain vote lei nana pawisa a lo ruahman ningnawi an hmuh thu leh thlai thar lei nan hmang hlauh teh ang an ti a, thlai thar 4 leina tur an puang niin a sawi a, hetihlai hian tlai thar dang 3 chu an rate aia sanga leitu an awm avangin buaipui a ngai lova pawisa pawh sen a ngai lo tih sawiin, hmunphiah pawh hetianga tih an tum thu a sawi a, sorkar rate anga lei duh RR associate te’n lei mai tura an ngaih laiin an rin aia an lo chet theih loh thu leh hnathawktu an lo neih tawk loh avangin sorkar beisei an phak lova hei hi sorkar chetsualna chhan ber pawh a nih thu a sawi.
Lalduhoma chuan support price pek tur sum nei mah se, hmunphiah thartute’n an lo hralh nual tawh avang leh chhinchhiah a awm lo a, hmuntinah society din a nih bawk si loh avangin support price pe turin a ngaihna a awm tawh lo ni-a sawiin hmunphiah chingtu thenkhat leh a leitute pawisa lo inpe lawk an awm avangin loh theih lohin an hralh a ngaih thu a sawi a; Pu Lalduhoma chuan hmunphiah lei tura hnam dang lo lut tur lo dang pawl an awm nia sawiin hemi avang hian hnam dang te hi an lut tha ngam ta lo a, hei hian an buaina a belhchhah niin a sawi bawk. Royalty chungchang sawiin Chief Minister chuan, sorkar hmasain an lak thin chu hmunphiah chingtute chu eizawnan ngelnghet la nei lo an ni a, chhiah chawi tlak an ni love tiin Tax holiday engemaw chen an pek thu a sawi a, transit pass pawh a thlawna kaltir duh hle mah se, Vairengte thlanglamah a tlang theih loh avangin loh theih lohin a hniam thei ang berin an la tih a sawi bawk.