Mizoram Police leh Excise and Narcotics department thawktute chuan kumin January ni 1 leh March ni 31 inkar (thla thum) chhung khan heroin kg 38 leh gram 360 an man.
Mizoram Police-in thla thum chhung hian heroin kg. 19 leh gram 790 bakah Methamphetamine kg 27 leh gram 277 an man a. Ganja kg. 27 leh gram 200 an man bawk a ni. Ruihhlo a inhnamhnawihte lakah thubuai 92 an ziak lut a, mihring 120 an man bawk a ni. Kumin chhunga Police-in ruihhlo an man, heroin, methamphetamine leh ganja te hi tualchhunga hralhnaa chhutin cheng vaibelchhe 10 leh nuai 60 chuang hu a ni. Hetih lai hian hemi hun chhung vek hian Excise and Narcotics department chuan heroin kg. 18 leh gram 570 an man a. Police leh Excise & Narcotics department-te heroin man belhkhawm hi kg 38 leh gram 360 a tling a. Excise & Narcotics department hian hemi hun chhung hian methamphetamine kg. 106 leh gram 648 an man bawk a, Police-te man nena belhkhawm chuan Methamphetamine man hi kg. 133 leh gram 925 zet a ni.
Hetih lai hian Excise and Narcotics department-in an chhinchhiah dan chuan tun thla thum kal ta chhung khan Mizoramah ruihhlo hman sual avangin mi 12 an thi tawh a. An vai hian heroin leh damdawi dang tihpawlh vanga thi an ni a, thi zinga 10 hi mipa niin 2 chu hmeichhia an ni. Tun hnai-ah Heroin, Methamphetamine leh ruihhlo dang tawlhruk a hluar a, man pawh a tam hle a, hei hi a chhan ber ni-a dan kengkawhtute’n an sawi chu a rawn kalna Myanmar mipui sorkar sipai chakna hmanga hnehchhuh a nih vang a ni a. February ni 1, 2021 a sipai-in thuneihna an chhuhluih atang khan Myanmar ram, a bik takin Mizoram dep Chin state-ah sorkar inrelbawlna mumal a awm theih tak loh avangin ruihhlo tawlhruk hi tun hma aiin nasa takin a hluar ta a, man pawh a tam ta niin an sawi.
==============================