Mizoram State Boundary Committee thu khawm chuan Mizoram sawrkar leh Assam sawrkar indawrna kal tluang lai, Mizoram inthlanpui neih dawn vanga chawlh lailawk chu tharthawh tura hmalak tha an ti.
Vawiin khan Mizoram State Boundary Committee chu an Chairman Pu K. Sapdanga, Home Minister hovin Directorate of Forensic Science Laboratory Conference Hall-ah a vawi 6-na atan an thukhawm a. Boundary Committee Chairman Pu K. Sapdanga chuan Member leh sawm bikte lawmna thu sawiin meeting koh a nih chhan leh thil pawimawh dangte sawifiah a, hemi hnu hian Pu H. Lalengmawia, Commissioner & Secretary, Home Department, Boundary Committee Member Secretary ni bawk chuan report a pe a ni.
Vawiina meeting hian sawrkar hmasa hun tawp lama Mizoram sawrkar leh Assam sawrkar indawrna kal tluang lai, Mizoram inthlanpui neih dawn vanga chawlh lailawk chu tharthawh tura hmalak tha a ti a, hei bakah hian ramri chungchanga ngaihdan hrang hrang awmte sawiho niin hun remchang hmasa berah thutkhawm leh nise an ti a ni.
Home Minister, meeting kaihruaitu ni bawk chuan ramri him tak, mipuite thlamuang taka an khawsak theihna tur nawr chhuah chu an thupui ber a nih thu sawiin, thenawm state te nen kan lungrual tlanna tur kan zawn a pawimawh a ni a ti a. Sawrkar hmasa hmalakna te chu zahawm a tih thu sawiin an ngai pawimawh hle bawk tih a sawi a ni.
Vawiina meetingah hian pawl leh party hrang hrang aiawhte chuan ramri buaina chinfel a nih a, inremna neih thuai an duh tawh thu an sawi hlawm a ni.