Excise & Narcotics Dept changtu Minister Lalnghinglova Hmar chuan tun dinhmunah Sorkarin zu zawh tumna a neih loh thu House a hrilh.
Vawiina Assembly House-a Rohmingliana, Thorang bialtu zawhna Sorkarin zu zawrh tumna a nei em tih chu Pu Lalnghinglova Hmar chuan sorkarin tun dinhmunah zu zawrh tumna a neih hriat a nih loh thu a sawi a; Tuichang MLA, W Chhuanawma zawhna Ruihhlo dona kawngah sorkarin eng chen nge hma a lak tawh? tih chu Pu Lalnghinglova chuan Ruihhlo dona danpui kengkawhtu nodal dept excise & Narcotics Dept-te chu fuih thar an nih thu sawiin Central YMA, Kohhran thalaite nen ruihhlo do dan tur inrawnkhawma sawiho a ni a, District tinah ruihhlo dotu bik tur Narcotics Cell tihchangtlun bakah District thar pathum Khawzawl, Saitual leh Hnahthialah te station din tura hmalak mek a nih thu a sawi a; Hnathawktu lak belh leh hmanruate thuam tha tura hmalak mek a ni a, chak zawka ruihhlo do a nih theihna turin excise & Narcotics Dept hnathawkte transfer anga kalpui tura hmalak a nih thu a sawi bawk.
Baryl Vanneihsangi, Aizawl South III zawhna chhangin ruihhlo dinhmun chu a tehna awm chiah lo mah se, Excise & Narcotics Minister chuan, Mizorama ruihhlo dinhmun dik tak sawi a harsa a, ruihhlo dona kawnga tha thawh nasa, CYMA Kumpuan Committee member te sawi danin ruihhlo man a sang hret a, a vang hret an ti a, a tehna tak tak hriatthiam a harsa a. Man tur awm lo nge man tam chu hlawhtlinna tih pawh hriathiam a harsa tih sawiin tlem chuan a ziawm hreta an hriat thu a sawi a; chutih rual erawh chuan man a tam dan atangin a la rem vak lo tih a chiang niin a sawi a; Excise & Narcotics Dept changtu Minister chuan kumin 2024-a Excise & Narcotics Dept -in ruihhlo an man dan House-ah hian sawiin Rakzu itre 12,608 man a ni tawh, Zu bilh lai Tin 23,484, a sen chi um puitling um 3,373, um chanve um 334, um chanve chanve leh um 1,473 man a ni tawh a. Heroin Kg 15.083, Methamphetamine Kg 96.485, Khuh damdawi Bur 1764 man tawh niin ruihhlo kaihhnawiah mi 1211 man an nih tawh thu a tarlang bawk a ni.
Lalnghinglova Hmar chuan, department chhunga thawktu indaih lo chu an harsatna lian ber a ni a, Mizoram khawtlang lama harsatna awm te pawh enzui zel an tum niin a sawi.