Power & Electricity Minister F Rodingliana’n sorkar tharin hydel project siam tumin hma a la tih House a hrilh.
Lalchhuanthanga, Aizawl South II bialtu MLA zawhna chhangin Power & Electricity Minister F Rodingliana chuan tunah hian Tuivai Hydel Project, MW 150 pe chhuak thei Ngopa bul te, Tlawng Hydel Project, MW 120 pe chhuak thei Lungleng bul leh Tuirini Hydel Project MW 24 pe chhuak thei turte chu thawh a nih theihna turin hmalak tum mek a nih thu sawiin hmalak tumna hmasa erawh chu sawi mai theih a ni lo a, Hydel Project siam tura thil tul pawimawh hrang hrangte leh a thawhna tur sum leh paite hmuh hmasak apiang thawh nghal zel a nih tur thu a sawi bawk.
Power & Electricity Minister chuan V Malsawmtluanga, Lunglei North bialtu MLA zawhna ‘Kawlphetha pek luh lohna khuaah pek luh tumna a awm em?’ tih chu chhangin
Central Scheme RDSS hnuaiah Mizoram khua zawng zawngah kawlphetha pe vek tura hmalak a ni a, tunah DPR siam tawh niin Central-ah a la mu mek a, a rawn chhuah theih chuan Mizoram khaw tinah eng pek tum a nih thu House a hrilh bawk.
F Rodingliana chuan H Ginzala, Champhai North bialtu zawhna chhangin, Power & Electricity Department hnuaia Civil Wing-a officer leh staff dangte chu Department-in civil works enkawl tur ang chi Head Office hnuaia Civil Wing-ah te, Circle-ah te, Division-ah te, Hydel (Hydro-electric) project enkawltu leh a dangte-ah hman an nih thu House a hrilh a. A nihna tur anga chhawr loh anga lang chu tun sorkar-ah chuan an buai hle a, a buai berte zinga mi an ni tawh a, lui chan bik insem tir an ni a, report pek tur hun te siamin, civil wing chu an hmang tangkai hle niin a sawi.
P&E Minister Pu F Rodingliana chuan zawh belhna chhangin Lunglei khua atanga km 7 vela hla, Tlawng luiah khuah tum a ni a, Bairabi to West Phaileng via Mamit, 132 KV line commission theih hun a hriat mai loh a, Forest department-ah harsatna an tawk a, hrui zam theih a ni lo a, sum chawi ngai erawh an chawi tawh niin a sawi bawk.