School Education Minister Dr. Vanlalthlana chuan vawiin khan a pisa-ah chanchinbumite kawmin Sorkar kal chhuak tain school hrang hrang a lo upgrade tawh chu tun tinhmunah chuan an status ngaia la awm phawt tura tih an nih thu a sawi a, an dinhmun tak tak hi zirchian a nih hnuah tehfung awmte hmanga uggrade ngaite upgrade tura hmalak a ni dawn chauh niin a sawi bawk.
School Education Dept hnuaia aikal la te list chu PD&AR ah theh luh tawh a nih thu leh an dinhmun tur chu DP & AR thu ngaihchan a nih thu a sawi a, Academic Yeatr tharah NEP 2020 inkaihhruaina angin Pawl 3, Pawl 5 leh pawl 8-ah te random examination neih tum a nih thu sawiin hemi tur hian zirna in zawng zawngte lo inpuahchah tura hriattir an nih thu leh school thlan bikah te exam hi kalpui a nih tur thu a sawi a; National Curriculam Framework chhuak thar tur hmangin elementary level syllabus siam that tum a nih thu a sawi bawk.
School Education Minister chuan SEDP hnuaia thawktute chu March ni 31, 2024 thlenga thawk tura lak an nih avangin an thawh hun chhung pawhsei sak an ni dawn lo tih sawiin Post hnawhkhah ngai te hnawhkhat tura hmalak mek a nih thu a sawi a, SEDP hnuia aikal la te chu ai kala an chhawrte account-ah an kut hnah man thunsak tum a nih thu a sawi bawk.
Dr. Vanlalthlana chuan Mizoram Education Act leh Rules & Regulation dangte chu a tul anga tunlai mil her rem tura hmalak tum a nih thu sawiin Sorkarin zirtirtu indaih lohna siam tha turin zirtirtu thawklai mek sem rual tul a a tih thu a sawi a, Transfer leh Posting of School teachers rules siam that ngaite zirchian mek chu Council of Minister thutkhawm hmasak berah sawiho tura ruahman a nih thu a sawi a; HSLC-a ti tha zirlai 20-te chu te chu UPSC exam hmachhawn tura kaihhruai tha an tih thu a sawi bawk.
Dr. Vanlalthlana chuan Mizoram Educations Reforms Committee din tum a nih thu sawiin zirna kawng hrang hranga thurawn lakna tur leh zir bingna leh ruahmana buaipui turin Education consultant ruat tum a nih thu a sawi a, MLA tinin an bial theuha School adopt tur leh khawtlang nena tangruala school an enkawl theih dan tur ruahman tum a nih thu a sawi bawk.