JH Lalhunliana, kum 45 mi Samthang khua chu an ram vahnaah Silaiin a inkap palh a, a hliam tur loin a thi.
Samthang atanga Maipawl thu dawn danin Inrinni chawhnu dar 1:30 vel khan JH Lalhunliana-te hi Samthang leh Farkawn in rinna Lamsial puk thlen hmaah ram an vak a, JH Lalhunliana hian Lungpui chungah thu-in phone a en a, a phone en lai hian silai a mu thun sa a ken chu a thlauh palh a, Lungah insawh puakin JH Lalhunliana hi Silai mu-in a fuh a hliam tuar loin a boral zui ta a ni. A ruang hi Inrinni zanah lumen niin nimin Pathianni khan vuiliam nghal a ni.
Champhai Police hnen atanga Maipawl thu dawn danin an chhui zui tawh chinah mahni intipalh anga a lan avangin Dungtlang Police Station-ah UD Case ziah luh a ni a, an la chhui zui mek zel a ni.
Jh Lalhunliana hi Samthang tlangval tlawmngai berte zinga sawi a ni a, kum 45 mi ni chungin khawhar in riah leh thlan laih a hmaih ngai lo a, mitthi an awm a, thlana pangpar thehtur neilo chhungkaw tan pangpar theh tur a buatsaihsak thin bawk.
Hetianga tlangval tlawmngai a nih avang hian a thlan pawh thuk taka laih niin mitthi dang thlana pangpar a theh sak angin tlangval thlan laite’n a thlanah hian pangpar an theh sak ve a; Samthang khawtlang chuan an khaw tlangval tlawmngai hi ui takin an thlah liam a ni.