Champhai District a Sesih khawtlang chuan an khua atanga Medical Doctor, Mizoram Sawrkarin a sawn chhuah tur duh lovin vawiin atang khan an khaw kawtchhuah ah doctor chhuak tur danga Gate siamin an pungkhawm.
He khuaa Doctor awmchhun chu a aiawh tur sawrkarin a ruahman hma chuan an khua atanga insawn chhuah an remtih loh thu leh a tul ang ang a doctor chu danbeh an tum thu Sesih khawtlang chuan tarlangin Sesih khuaah hian Kum 1986 atang khan khum 10( sawm) awm theihna Primary Health Centre Mizoram Sawrkarin dahin Kum 33 zet Doctor in a thutchilh loh hnuah, Kum 2020 October thlaah Doctor Sawrkarin a dah a, Sesih PHC hnuaia khaw hrang hrang- Sesih, Lianpui, Leisenzo leh Khuangleng khuate’n an tangkaipui em em laia an Doctor neihchhun Siaha District Tipa khua a sawnchhuak tura Sawrkarin tun thla ni 25 a Order a chhuah chu an hriat thiam loh thu he khua a NGO Pawl hrang hrang (YMA, MHIP, MUP, Games & Sports Association) leh VC ten thuchhuah siamin an tarlang a. An ni bakah hian Leisenzo, Lianpui leh Khuangleng VC te pawhin Sesih atanga Doctor sawnchhuah chu an hriatthiam loh thu leh Sesih khawtlang hmalakna chu a tawp thlenga an thlawp tur thu thuchhuah siamin an tarlang ve bawk a ni.
East Tuipui bialtu MLA Pu Ramthanmawia pawhin Sesih PHC chu ramri hrul sensitive area a nih avang leh mipui mamawhna a san em avangin Health Minister Pi Lalrinpuii hnenah Transfer order hi sut leh turin ngenna lehkha a thehlut ve bawk ni.
Tuipuira Zirlai pawhin Sesih doctor sawn chhuah a nih chu hriatthiam har an tih thu sawiin a awih tur mi dang sorkarin a dah thei dawn a nih loh chuan sawn chhuah an remtih loh thu an sawi a, bial chhung mipuite’n an mamawh em em laia a aiwhtu awm lova hmun danga sawn chhuahsak tumna chu a tawp thlenga an dodal tur thu an sawi ve bawk.