Horticulture Minister Prof. Lalnilawma’n tun dinhmunah sorkar ruahman angin sawhthing lei ala ni lo a, sorkar minimum fixed rate cheng 50 a lei turin Budget-ah dah tum a nih thu House a hrilh.
Vawiina Budget session thutkhawma Siaha Bialtu MLA Dr. K Beichhua zawhna leh zawhbelhna dangte a chhannaah Prof. Lalnilawma chuan, sorkarin District tin leh khuaa society dinnaah chuan society kaltlangin sawhthing lei tum a nih thu sawiin a leitu tur leh society te indawrin an inbiak remna rate anga kalpui tur a nih thu a sawi a, hetihlai hian sawhthing thar chhuah ang te chu sorkarin a minimum rate cheng 50 a lei a nih theih nan budget-ah pawh dah tum a nih thu a sawi.
Prof. Lalnilawma chuan society din tawhna te dinhmun zirchian a nih dawn thu sawiin rintlakte chu hmanzui an nih tur thu te, a la din lohna khuaah awlsam zawka din a nih theih dan tur pawh sorkarin a ngaihtuah mek a ni a ti a, hetihlai hian thlai hrang harng te chu society pakhatin a buaipui theih chu duhthusam a nih thu sawiin society indin an awm pawhin sorkar nen enhovin hma lak ho zel a nih dawn thu a sawi a, Sawhthing rate chungchangah sorkarin quotation a chhuah dawn lo tih Horticulture Minister hian sawiin khawtina society din te leh a leitu tur te inbiain tender pawh a tul anga chhuahin hemi ang hian kal a nih dawn thu a sawi a, sorkar fixed rate a neih sa aia hniam a awm chuan hetah hian sorkarin hma a lak dawn thu a sawi bawk.