Nimin February Ni 23 khan Lawngtlai District Vathuampui khuaa mipahnih Lui kal chu Savawmin lo beiin, an taksa hmun engemawzatah hliam an tuar.
The Lawngtlai Post tarlan danin Nimin khan Vathuampui khuaa khawsa mek Pu Joseph Ngurthanzawna kum 38 leh Pu Lalsangliana Kum 27-te chu Vathuampui atanga Km 5 vela hla Seletiva lui-ah Sangha man turin an kal a, Pu Lalsangluaia sawi danin luia an awm lai hian Savawm lo chhuak thut in, an pahnih hian a rawn bei ta a, theihtawpa lo in vengin, hun engemawchen an inbeih hnuah Savawm hian a kiansan ta a ni. Savawmin a seh mi pahnihte hi nimin tlai khan Lawngtlai thlenpui niin Lairam Christian Medical Centre & Hospital ah luhpui an ni a, hliam pakhat zawk Joseph Ngurthanzawna chu a hliam a nat deuh avangin enkawlna tha zawk dawng turin Lunglei panpui a ni.
Lalsangliana hi a lu leh a mit ko bakah a ban veilam leh ding lamah Savawm hian a seh a, Joseph Ngurthanzawna chu a ban veilam a tliak a, a lu ah hliam a tuar bawk
Vathuampui VCP Pu C.Lalvuanthanga chuan, tun hma pawhin an ram chhungah Savawmin a beih hi an lo awm tawh tih sawiin, hetianga harsatna an tawh chungchang hi Forest Deptt ah emaw an la thlen ngailoh thu a sawi a. An ram chhunga mihringte bei mai duh Ramsa an awm chuan khuaa mite a ti raltiin, an eizawnna ber Lo neitute pawh a ti ralti thin hle niin a sawi bawk.