Mizo Lal zinga lal ber nia inchhal, Kumpinu Sawrkar laka tlawm hnuhnung ber nia sawi, Sailo lal Kairuma puan chu Mizo Hlakungpui Mual Robawma dah that turin a rochuntu hnuhnung ber Pi Nuthangi chuan nizan khan Mizo Hlakungpui Mual committee kutah a hlan.
Kairuma puan hi British Sipaite’n Tlaikuang an hal dawn khan a nupui Thangthluaiin a laizawn (unaunu) Ralchhingi hnenah him taka kawl turin Puan Rin (stripes/lines), Pawn Dum leh Ngotekherh a pe a, Pi Ralchhingi hian a fanu Bungluaii hnenah a rochun leh a, Buangluaiin a fanu naupang ber Khawsiami a rochuntir leh a ni. Pi Khawsiami hian a fanu naupang ber Nuthangi rochuntir chhawng lehin, an chhungkaw rorel angin Pi Nu-i (Nuthangi) hian Mizo Hlakungpui Mual Robawma dah turin nizan khan an chennai in Ramhlun South ah Mizo Hlakungpui Mual Committee kutah a hlan a ni
Pi Nuthangi chuan Kairuma puan chu uiin an chhungkaw inrochun zelah hmun dang dah chu hreh viau mah se, Mizo mipui tam zawk hmuh theihna pho chhuah leh a hlutna a zual zawk beiseina Mizo Hlakungpui Mual Robawma dah hi chhungkuain an titlu ta niin a sawi a. Mizo Hlakungpui Mual Committee chairman chuan lawmthu a sawi bawk a ni.