Pawikhawihtua an puhte hi Champhai Kanan Venga chengte an ni a. An nu ber bakah an kut man tak a fate pahnih an ni a. A fapa hi kum a la tling lo nghe nghe. An thil rukte hi hralh sumah an ti lem lova, chu chu a danglamna lai tak leh chhui chhuah an har em em chhan pakhat a ni.
An thilruk khawm hmang hian an khawsa a tih theihna chin a awm a, chuti chungin Kohhrana thilpekah chuan a thahnemngai ber an ni lawi si a. Hei hi a danglam chhan leh pakhat a ni. Tun dinhmunah an pawikhawihna zawng zawng hi hriat chhuah a la ni lova, an chetdan leh an chet chhan kimchang pawh hriat a la ni chiah lo. Kan hriat ang chin, a chiangte bakah an sawi, mahse kan nemngheh lohte kan tarlang dawn a ni.
A chiang atangin tan ta ila, rukruk hna hi covid-19 hnu lam atang khan an kalpui tan a. Kum hnih chhung vel chu hmun hrang hrangah an che a. An chetdan hian kawng hmang mumal tak a nei lem lo bawk. Rukru thangte chuan chetdan phung, tihdan bik leh chet duhna lai te, bitum bikte an nei thin a. Mahse hemite erawh chutiang chu a ni lo. Remchang an hmuh fuh chuan an bei mai thin a. A thenah chuan han bitum deuhte pawh an nei ve bawk a. An bitumte hi a tlangpuiin ina awm ngai lo deuh te an ni thin a. A inhnamhnawih pakhat chuan kut tling lova sum lalut thin nia kan hriatte pawh kan bitum thin, tiin a sawi a. Hei hi erawh hi chu a thleng chiah em tih nakinah kan la sawi chhunzawm ang.
A sawi zel danin a tirah chuan chawhmeh atangin an tan a, antam leh a dangte chu an ruk hmasak ber a ni a. Chuta tang chuan an kaisang ta zel a, vawiina an chenna in atanga police ten an thil ruk tawh an lak atangin an kaisanna hi a lian khawp mai. Inverter te, drawer te thlengin a ni a. A nepnawi lamah phei chuan nail polish atanga buhfai thlengin a ni thung a. Thawmhnaw leh in chhung bungruate chu a tam ber an ni ta awm e.
Chet chhuah hun atan hian zinglam, mi muttui lai tur velah a ni tlangpui a. Zanah hian an mu ngai tam meuh lo, ni khatah a tlangpuiin darkar 5 vel an mu thin a. Champhai khawpui hmun hrang hrangah an che zui ta a. A changin dawr, a changin chenna inte, an mamawh dan a zirin Biak in leh office te pawh an rawk tel bawk a. Office hi chu tum khat an khawih tih lovah chuan an lut lova. Biak in pawh an mamawh dan a zirin an rawk tel mai zel a. An in rawk turte hi a kalhna screwdriver nen an hawng thin a. Chubakah chuan an in rawk atang hian tala leh chahbi an la tel tlangpui bawk a.
Chahbi hi a siamtu company thuhmun, a intiatah chuan a lo inmil duh viau ni tur a ni, hmun danga in rawkna atan an hmang nasa viau a. Champhai veng pakhata an chetnaah chuan an chahbi ruk chhuah leh dawr kalhna a lo inmil a, an hawng a. Bungraw thenkhat an la chhuak a.
Bungraw thenkhat tih hian hei hi an danglamna em em chu a ni. Rukrukna thlengah chuan sum hmuhna atan te, hausakna atan te an ru ngai lova. An thil ruk chhuahte hi an mamawh tawkin a ni tlangpui a. A thenah chuan midang tanpuina atan te pawh an hmang leh thin niin an sawi. Dawr an rawknaah pawh hian a neitu hian police te hnenah a thlen tirhah a hrilh a. Sawi loh aiah ka rawn sawi mai mai tiin a dawra thilbo hi a tlem hle a, lak tur a tam tehlul nen, an la tlem khawp mai, a ti a. A rawktu lam chuan kan mamawh aia tam kan la ngai lo, an ti ve mai thung.
He dawr hi tum hnih an khawih a, an khawih vawihnihnaah erawh chuan engmah an la lova, tala pawh midang chahbi hmang an hawnna nen an hnutchhia a. Dawr neitute leh police te pawhin mak an ti viau. An man takah hian dawra an luh hnu lawkah khan vawk talh turte a bulah an rawn kal a. Engmah la hman lovin an inthiar fihlim ta zawk tih te hriat chhuah leh a ni.
Chutiang chu an bitum bik tih lam hi an nei lem lova, hei hi chhui chhuah an harsatna lai pakhat a ni. Vawiina Champhai Police station-a an thil ruk chhuahte an chinfelnaah, an pawikhawihna tuartu thenkhat an rawn kal a. A then chuan an laptop an rawn lam, a thenin an camera, a thenin an thawmhnaw te. Pakhat phei chu rawn lawm lo khawp mai, ka nail polish hmanlai te nen lama inruksak duh ni, a rawn ti a. Musical instrument tih te nen, an thil ruk hi a tam tham hle a. Mizoramah chuan tum khata thil ruk an hmuh let tam ber tum a la ni ta hial awm e.
“Hetiang zawng zawng hi hralh atan in hmang si lova, eng atan nge in tih?” tia kan zawhna chu a inhnamhnawih pakhat chuan, kan hmang vek alawm, tiin, an bungraw ruk an hman dan tlangpuite min hrilhfiah a. An then an tihchhiat avanga an paih tak te, thirchhe hralhnaa an hralh takte pawh a awm bawk a. An mamawh bak hi chu an ru meuh lo ti ila, midang tanpuina atan te an hmang veleh bawk a.
Tum khat chu kohhran pakhatin tingtang an mamawh tih an hria a. Kohhran danga mi tingtang an la chhuak a. A mamawhtute hnenah chuan an zuk dah mai a, hei hi thilpek a nih hi, sawi chhuah kher pawh a ngai lovang tiin an zuk hnutchhiah a. An thil ruk thenkhatte chu mi harsa zawkte tanpuina atan an hmang thin bawk niin an sawi a. Hemi kawngah hian an chanchin hre hmasate chuan a Robin Hood raih mai, an ti a. Robin Hood-a chanchinin a inspire anga sawi te pawh a awm a. Mi hausate kan bitum thin an tia chhal a awm a nih kha.
Mahse an chetdan phung en hian an awm ngai lo tia bitum bik chu nei mah se kut tling lova hausa aiin a remchang zawk tia an bitumte an ni tlangpui a. Vawiina an bungraw lamtu tam ber chu kut tlinga sum laluttute an ni tlat. Chuvangin Robin Hood, kut tling lova hausate hnen atanga laksak a, mi rethei zawkte hnena pe thin anga chhalnaah, hetiang hian a thleng chiah em tih sawi theih a ni lo. Mi rethei zawkte hnenah chuan an pe ngei a, mahse an laksakte hi kut tling lova sum laluttute an ni chiah em tih zawhna a awm thung.
Engpawh nise an thil ruk khawm hi a tam hle a, tukin atang Champhai Police te chuan an thiar chhuak a. Thahnem tak Police Station tualah an chap darh a. Chawhnu lam khan thahnem tak an la leh bawk a. An chenna ina an bungraw kawl zawng zawng atangin an ruk hi zaa 60 atanga 70 bawr vel chu a ni ta hial awm e. Chutiang khawp chuan a tam.
Pawikhawihtute mak em emna pakhat chu heng bungraw tam tak hi chumi atanga kan lak chu tiin an la chhe hrang thei vek mai. Entirnan, thawmhnaw pawh chumite ina mi chu hei hi tiin an chhep hrang vek a. A te nawi deuh, tala thlengin a neitute an la thliar hrang thei vek a. Tute in nge an khawih tih lah an chiang hle bawk. Rukruk thubuai hrang hrangah an sulhnu a nih leh nih loh an la sawi thei deuh vek a, chumi hmun chu kan khawih lo. Chumi hmun atangin heng bungrua chauh hi kan la chhuak tih te, bungraw kim lo an thehthang dan zawng zawng nen an hre vek.
Rukruk hmanga eizawng, misual tak angah kan lo ngai maithei. Chu chu a nihdan a ni leh chuang miah lova, hei hi chiang lo ti ila, kan finfiah lohte awmna a ni tel bawk. An chhungkua hi Pathian thu-a inkaihruai thin an ni a, an inkaihhruai dan leh an kal dan erawh dik chiah lo lai a awm niin a lang. Kohhranah nise thilpek pe tam ber an ni hial awm e. Bible-in sawma pakhat a phut laiin anni chuan sawma 7 te an pe thin a. An chhungten buhfai leh pawisa an pekte chu thilpekah a kal zo deuh vek thin a. An ruk chhuah hi an intunnunna chu a ni ta ber a. Hlawkpuina atan in hmang si lova, rukruk hi sualah an ngai lo han ti dawn ila, ru suh tih te, awt suh tihte chu an hre tho bawk si a. Bible lah nise an chhiar chhuak chang a ni lova, a ziahin an ziak chhuak a, a thenin an ziak mek bawk a. Rukruk loh tur tih erawh a lang chuang lo, Bible ziahna tur lehkha hi Kohhran atangte leh office atang tein an ru chhuak tho bawk si a.
Hetianga an chet chhan hi kan nemgheh theih loh lai chu a ni ta a. Sawi dan pakhatah chuan nu berin a fate hi rukru turin a tichhuak thin anga chhal a awm a. Zing hma takah a kaithovin a tir chhuak a, hum haw an neih loh chuan a thinrim thin nia sawi a ni a. Mahse hei hi kan hriat theih chinah kan nemnghet thei lo thung a. Rurkru tura thawk chhuakte hian a nuin a tirh chhuah thu hi chu an pha lem lova, mahse rukru turin a tir tih zawngin an sawi lo thung a. Pawna chhuak turin a ti mai zel a ni awm e. Hemi chinah hian zep an nei em tih erawh zawhna a awm.
A chhan chu an kalphung innghahnaah hian Eliza an hmanna chin a awm a. Eliza khan hna a thawk lova, Pathianin a chawm a tih hi sawi chhuah tel a ni a. An mamawh tur ang ruk khawm hmanga nun hi an rinna atangin a chhuak angin a tinzawn theih. Kan hriat chian loh lai hi chian theih dan kan nei a nih tak leh, kan la chhunzawm leh dawn nia.
Kum hnih chhung vel chu hetiang hian an khawsa a, mahse an thenawm khawvengte pawhin an hre miah lova. Inah hian kawngka an kalh deuh reng a, an len chhuah ngai loh bakah in leng an nei ngai lova. Chubakah chuan hausakpui tur thil an la tlat lo, an in chhung mamawh tur angte an khawm a, an inah hian rinhlelh tur an lalut lo a tih theih a. Kohhran thil khawna chuangkai an awm pawhin rinhlelh tur hi hmuh mai tur a tam tlat lova. An inchhunga thil thar lut leh chhuak hi an thenawm khawvengte chuan an hmuhpui lo tihna a nih chu.
Pathian thu-ah hian an kal na viau nia sawi a awm bawk a. Inrinni-ah an inserhin pawnah an chhuak ngai lova, chubakah chuan chaw pawh ni kar thlakin an ei a. Pathianni hi ni hmasa berah chhiarin chaw an ei a, Thawhtanni-ah an nghei a, chutiang chuan a ni kar thlakin chaw an eiin an nghei thin a. Heng zawng zawng ngaihtuah khawm hian he pawikhawihna hi sualna ni lovin rinna lama kalsualnain a hrin chhuah nia a lan theihna a awm a. An pawikhawihnate erawh dan hmanga an chungthu ngaihtuah leh tur a la ni.
Man chhuah an nih takah chuan Champhai Police station-a rukru thubuai chu a lo berah 6 tal an chinfel phah dawn ta awm e. Police te hian anmahni hi an zawng thin a, an rin loh lam tak an lo ni a. Chuvanga man lo an ni a, an thilrukte an hralh chhuah leh loh avangin a hnu chhui hi a har lehzual. Hemi chianna atan hian laptop bo hi i hmang teh ang.
Champhai Vengthara tualthahna thlen lai vel kha a ni ta. Lirthei pakhat atangin laptop a bo a, Vengthar khawtlang hruaitute Thana-a an kal lai khan laptop tibotu hian police te hnenah complain a han thehlut a. A lirthei a kalh lova, a laptop hi an ruksak niin a sawi.
A laptop-ah hian security a dah tha angreng a, hralh emaw hman tumna a awm a nih chuan computer dawrah an kalpui ngeiin a ring a. Dawr hrang hrangte lo bengvarsak turin a ngen a. Mahse a laptop bo erawh a reh ta vang vang. Hmuh leh a beisei loh karah tuna rukrute an manaah hian hai chhuah a ni a, an tihchhiat avangin a khawl awmna lam zawng thirchhiaah an hralh a, a screen chiah an lo kawl tawh a. Hlawkna uma hralh leh tur nise chuan hmuh let lehna remchang a awm, mahse chutiang tur chuan an ru miau si lo.
An thil ruknaah hian mita hmutu thenkhat an awm a. Dawr pakhat kan sawiah khan, polypot turin sangha dahna bawm var an keng hmu an awm a. Mipa leh hmeichhia an nih thu police te hnenah an hrilh a. Mipa leh hmeichhe zawn hian Police te chuan an zawng ngei mai, hetiang rukru thang chu ruihhlo ngai an ni ang tiin a rin loh theih loh. Chubakah chuan an mi zawnte hian CCTV an dahna an hre tlangpui a, CCTV-ah an chetna hi a lang ngai meuh lova. A bulhnaia an kal te chu hmuh tur a awm a. Mahse rinhlelh tina tin chi an ni lo, ruihhlo an khawih lova, zuk leh hmuamah takngial pawh an fihlim tlat.
An mante hi nufa an ni a. Pakhatin kum a la tling lo nghe nghe.