Special Court, ND&PS Act, Champhai chuan Methampetamine Kg 14 leh Gram 228 neitu Haukhenkhama, Vengthar, Champhai chu thiam loh chantirin kum 11 hrehawm taka Lung In tang tur leh cheng nuai 1 chawi turin a hrem.
Court thu remnaa tarlan a nih danin Kum 2019 June 1 khan Champhai Police te chuan Champhai Vengthara Haukhenkhama inah Methamphetamine kg 14 leh Gram 228 a rit an man a. Ruihhlo kaihhnawihah hian mi pali Haukhenkhama leh a nupui Chingsiandingi bakah Lalengzauva leh Samsul Alum te man niin 22(c) of ND&PS Act hnuaiah thubuai siam sak an ni a.
He thubuai hi Special Court, ND&PS Act, Champhaiah ngaihtuah niin thuhretu hrang hrang te koh an ni a. Uluk taka ngaihtuah a nih hnuah Pu Liansangzuala, Judge, Special Court, ND&PS Act, Champhai chuan April 15, 2025 (Thawhlehni) khan mi pathum Samsul Alum, Lalengzauva leh Chingsiandingi te chu thiam a chantir a. Haukhenkhama erawh chu Section 22(c) of ND&PS Act hnuaiah thiamloh a chantir ta a ni.
Haukhenkhama ukil te chuan a vawikhat thubuai neihna a nih avangin a tlem thei ang bera hrem turin an ngen a. Sawrkar lam atangin Special Public Prosecutor chuan a na thei ang ber – Kum 20 lungin tang turin leh Rs Nuai 2 chawi tura hrem turin a ngen thung a; Pu Liansangzuala, Judge, Special Court, ND&PS Act, Champhai chuan an ngenna te uluk taka a ngaihthlak sak hnuah Haukhenkhama chu kum 11 hrehawm taka lung in tang turin leh Cheng nuai khat chawi turin hrem a. A pawisa chawi tur hi a pek tlak theih loh chuan thla 6 dang a tan belh leh dawn a ni.