Vawiin khan Commissionerate of Excise & Narcotics Conference Hall ah Excise & Narcotics Department chuan ruihhlo do chungchanga kohhran thalai hruaitute nena inkawmhona an buatsaih a. A hawnna inkhawm hi Chief Minister Lalduhoma chuan khuallian niin a hmanpui.
Thusawiin Chief Minister chuan, ruihhlo dona leh thalaite hmakhua ngaitu Excise Minister kan nei hi a vanneihthlak hle a, vawiina inkawmhona a buatsaih pawh hi a lawmawmin a bengvar hlein ka hria.” a ti. Thalaite ruihhlovin a run mek a, a do let turin thalaite bawk sipaiah a siam a ngai a, chumi bul chu an tan tih sawiin Sawrkar min thawhpui rawh u kan ti satliah lo, kan thawkho zawk dawn a ni, a ti.
Lalduhoma chuan Ruihhlo miin a ngaih tawh chuan a hmangaih zui tlat thin a, chu chuan a chhungte hnen ata a la hrang hret hret a, chhungkaw kimin maicham buatsaih hlei theih a ni lova, nupa inthenna te a pung a, chhungkuaah Pathian ram a thleng thei thin lo niin a sawi bawk.
Chief Minister chuan Ruihhlo do hi sawrkar-in tih mai mai a tum lo tih he thila inhnamhnawih thin te leh mi tinin-te hriatsak turin a sawm a, Department te leh Excise Department ngei pawh fimkhur tak leh dik taka kal tura ngenin “Huanpal hian a ven tur thlai kha pet thin se, chu huanpal chu thlak vat a ngai” tihna a ni, a ti.
Ruihhlo dona kawnga hmalak dan turah Central YMA hruaitute a sawipui tawh tih sawiin Chief Minister hian tlawmngaipawlte tichak tura Excise Acts han siamrem pawh a tul chho dawn niaa a hriat thu a sawi a. Tunah chuan miin Pathian a hlau lova, ramhuai a hlau lova, sawrkar a hlau bawk silova, a zalen lutuka chu chu a zo ta thin lo ni-a sawiin Vawiin atang chuan Excise Department hi ruihhlo tawlh ruk chingte leh a kaihhnawih dan bawhchhiate tan lo hlauhawm tawh ang che u, a ti. An department harsatna te chu sawrkarin theihtawp chhuaha a ngaihtuahsak tur thu a hrilh bawk a ni.