CDFA buatsaih Republic Day 2nd Div Football Tournament chu vawiin khan Semfinal khelh zawh niin Kahrawt FC leh SMFC Khuanglengin Final an lut.
KAHRAWT FC 4-3 ELECTRIC VENG FC
Vawiin Semfinal match hmasa zawkah Kahrawt FC leh Electric Veng FC inkhelin Kahrawt FC in 4-3 in hnehna an chang a. Kahrawt FC hian inkhelh tan atanga Min 4-na lekah B Lalremsanga hmangin goal an khung nghal a, Electric Veng FC tan min 16-naah Lalnunhlua’n an siphurh a sut a, Min 19-naah B Lalremsanga bawkin Kahrawt goal hnihna a khung zui leh nghal.
Ist Half tawp dawn Min 44-ah Joseph Laldintluanga’n Electric Veng siphurh a sut a, Min 47-naah Kahrawt tan Rikcy MS Bawihtlung-in an goal thum a khung a; 2nd Half-ah goal a lut har hle a, Min 90-naah Kahrawt goal 4-na Chhanrinpianga’n a khung a, Min 92-naah Electric Veng FC-in penalty atangin an siphurh sut then mah se, hun a tawp zui a, Kahrawt FC hian hnehna changin Final an inhlangkai ta a ni.
SMFC KHUANGLENG 3-2 FC VENGTHLANG NORTH
Semfinal hnuhnung zawkah SMFC Khuangleng leh FC Vengthlang North an inkhel a, Inkhelh tan atanga Min 8-na lekah Vanlaldika’n an lamah ti goal palhin SMFC Khuanglengin hma an hruai nghal a, he goal bak hi Ist half-ah goal dang a luh belh lo. Min 62-naah VLMS Dawngkima’n Vengthlang North Siphurh a sut a, Min 67-naah Vanlalawia hmangin Khuanglengin an goal 2-na an khung a, Min 82-naah Lalremruata’n FC Vengthlang North siphurh a sut a, Min 90 chhung goal dang a luh belh loh avangin hun pek belh khelh a ni a, Min 105-naah SMFC Khuangleng tan Lalruatawma’n goal khungin he goal hi Khuangleng chakna goal pawimawh ni zuiin SMFC Khuangleng hian 3-2 a hnehna changin Final an inhlangkai ta a ni.
Vawiin hian CDFA Cup match khat khel a ni a, Vengthlang FC leh New Champhai inkhelin Min 20-na thleng khelh niin inkhel enkawltute thuthluknaa lungawi lo an awm avangin Match khelhzui theih a ni lo.
Naktuk hian CDFA Cup Match 3 khelh chhunzawm a ni ang.
Dar 10:00 Vengthar FC vs Kanan FC
Dar 12:15 Vengthlang FC vs TMFC Melbuk
Dar 2:30 Bethel FC bs New Champhai FC