Vawiin khan Remna Ni vawi 38 na cham lawmna Mizo Zirlai Pawl General Headquarters ten LPS Arena, Falkland, Aizawla an buatsaih chu Chief Minister Lalduhoma chuan khuallian niin a hmanpui.
Lalduhoma chuan, remna a awm theih nana theihtawp chhuahtu All Party Leaders te, Student Joint Action Committee te, Kohhran hruaitute, hun harsa tak kara Law & Order kengkawh hram hram tu Pu Lalkhama, IAS, Chief Secretary te fakawm a tih thu sawiin Vawiina MZP ten an chawimawi kum 1981 a MLA atanga bang ta te chu, remna a awm theih nana MLA bang hmasaber te an nih thu a sawi a, an phu tawk chawimawina an dawng lo fo ni-a a hriat thu a sawi bawk.Pu Lalduhoma chuan Remna a awm theih nana khatihlaia India Prime Minister Pi Indira Gandhi ngenna leh MNF President Laldenga pawmpui ngeia IPS hna a bansan a nih thu sawiin rambuai laia hnam sipai, nunna chan te kha ram tan an thi lem lem lova, Mizoram an hmangaih avangin an martar tak tak a, zah leh chawimawi an phu em em a ni”, a ti bawk.
Chief Minister hian tun hnaia India ram chhung leh ram thenawma zofate awmna apianga buaina leh harsatna rawn thleng chu Zofate inpumkhatna tura Pathian remruat, nakin lawka malsawmna Zofaten an dawnna tur a nih a rin thu a sawi a, thinlunga pakhatah siam turin zofa zawng zawngte a sawm a ni.
H. Lalthianghlima, President, MZP chuan, pawl zawng zawng leh mi zawng huap Remna Ni lawmna an buatsaih thin tih sawiin, sawrkar pawhin MZP huaihawt hi rem min tihsak a. Tu ta bik mah nilovin kan zavaia tan a ni tih pawmin, i tel tlang dial dial ang u, tiin mipuite a sawm.
MZP-in Kumtin remna a awm theih nana mi pawimawhte chawimawina an hlan thin a, kuminah hian JH Rothuama, P. Lalupa, Lalthanzauva leh Ngurchhina te hnenah chawimawina hi an hlan a ni. Anni pali te hian Remna a awm theih nan kum 1981 khan MLA an nihna an bansan a ni.