January 25/01/2024 SIAHA
Siaha-ah auto-rickshaw driver chu thah niin a ruang zawn mek a la ni.
Siaha atanga thu kan dawn danin pawikhawihtu hi mi pali nia hriat a ni a. Tunah hian Siaha Police te chuan mi pathum an man tawhin pakhat hi a tlan chhuak a, a awmna chin hriat a la ni lova, zawn mek a ni. Pawikhawihtute hi Myanmar atanga raltlan nia sawi a ni a, mahse hei hi nemngheh theih a la ni lo niin thudawnna chuan a sawi a. An hming hriat theih a la ni chiah lo bawk.
Pawikhawihna tuartu hi Joasa, kum 20-a upa, Siaha ECM venga cheng a ni a. Nimin khan heng mite hian Siaha atanga Lawngtlai kal turin a auto-rickshaw an hmansak a. Tuipui ferry lam atangin an kal a. Tuipui ferry-ah hian engtikah nge an kal kai chiah tih hriat theih ni lo mah se a thawkte chuan chawhnu dar 2:30 atanga dar 3 inkar velah khan helai hmun hi an paltlanga an hriat thu an sawi.
Lawngtlai an thlen hnuah a hmangtute hian pawisa an nei lova, hun engemaw chen an innghak a. Pawikhawihna tuartu Joasa hian a chhungte a biakpawh hnuhnun berah chuan zan dar 8 velah Siaha-a a kir leh hman chauh a inbeisei thu a hrilh a. Nizan dar 7 vel khan Lawngtlai atang hian Siaha lam panin an chhuak leh nia hriat a ni a, a chhungte hian dar 9 velah an be pawp thei lova, an ngaih tha lovin police an pun a, tukin khan a rickshaw hi Siaha dai, Council Vety Firm bulah hmuh a ni.
Auto-rickshaw hmangtute hian an thah chhan hi a man pek tur an neih loh vang nia sawi a awm a, sawidan thenkhatah chuan a pawisa neih sa pawh chhuhsak an tum a, chumi avanga that ta chu a ni, an ti a. He pawikhawihna hi Siaha Police te chuan an chhui mek a, a pawikhawih chhan hi official-a hriat a la ni chiah lo.
A ruang hi an thukru a, a awmna hriat chhuah mai theih a nih loh avangin an mi man mi pathum zinga pakhat hi vawiin khan an hruai chhuak a. He thu buatsaih lai hian Tuipui Ferry-ah an la awmpui mek a. Ruang an dahna hi Lawngtlai lamah a nih hmel a, mipui pungkhawmin an lo dang bawk a. Chubakah chuan pawikhawihtute hian thil thlen dan leh ruang an dahna lai an sawi dan a hran zel avangin he thu buatsaih thleng hian a ruang awmna tak hi an la hmu chhuak thei lo niin thudawnna chuan a sawi tel bawk a. Tual an that tih erawh police te hnenah an inpuang tawh nia hriat a ni.
He pawikhawihna rapthlak tak mai thleng avang hian Siaha mipui an thinrim hle nia hriat a ni a. Mipui thinrim hi an inveng seng lo mai ang tih a hlauhawm nia thudawn a ni.
Pawikhawihtute hi Myanmar atanga raltlan ni ngeia hriat a ni a, nemngheh erawh a la ni chiah lo.
KUM 2023 AUGUST MUALLUNGTHU
Nikum August thla khan Lallawmsanga, Muallungthu thattu nia puh Thanga, Myanmar raltlan chu police ten an lo man tawh a.
Lallawmsanga hi huan bawr vela khawsa thin a ni a. A khawsakna velah hun engemaw chen an hmuh tawh loh avangin khawtlangin July ni 28 atangin an zawng a. August ni 3 chhunah a riahna thin thlam atanga metre 500 vela hlah thia hmuh a ni a. A ruang hi a lo chhe tawh hle a, thah a nih dan hi a rawng hle bawk. Pawikhawiha puh Thanga hi Hnahthial District-a Cherhlun refugee camp-a awm niin, mi huan enkawlin a inhlawh thin a. Lallawmsanga ruang an hmuh ni hian manin, Police te hnenah pawikhawihtu a ni tih hi a puang nghe nghe a.
A sawi danin Lallawmsanga awmna thlamah July ni 9 khan a kal a, a lo ruih avangin an inhnial a, an insual zuiin a rek hlum a, a tukah thlam atanga la chhuakin a ruang an chharna hmunah hian a dah ta niin a sawi.
2023 KHAWBUNG
Hei bakah hian nikumah vek khan Myanmar raltlan, Khawbunga awm mek chu tual a thah avangin dam chhunga tang tura hrem a lo ni tawh bawk a nih kha. Pawikhawihtu hi Hrangthanchea, Hnahthial, Falam District Myanmar, Khawbunga khuaa raltlan niin, khawchhak sumdawng Ngokhandova thattuah puh a ni a, puh a nihnaah evidence hrang hrang atangin Hrangthanchea hi Court chuan thubuai pahnihah thiam loh chantira, rim taka hnathawk chunga dam chung lung in tang tur leh Rs. 10,000 chawi turin a hrem a, a pawisa chawi tur hi a pe tla thei lo a nih chuan thla 2 dang a tan belh leh dawn a, hei bakah hian finfiahna tibo tura ruang a thuhruk avangin kum 3 Lung in tang tur leh Rs. 5,000 chawi turin a hrem bawk a, a pawisa chawi tur hi a pe thei lo a nih chuan thla 2 dang a tan belh leh dawn bawk a ni.
2023 CHAMPHAI
Nikum November thla khan Myanmar sipai raltlan Min Aung chu kum 10 tang tura hrem a lo ni tawh bawk a. Champhai Zote-a raltlante dahkhawmna hmunah a awm a, nikum September thla khan raltlan zing a mi ve tho Lalmuanpuia-te nupa chu an awmna pindanah luhchilhin zu lei turin a tir a, raltlan camp-ah hian zu leh ruihtheihthil lakluh phal a nih loh avangin Lalmuanpuia nupui Malsawmsangi chuan an kal theih loh tur thuin a chhang a, Min Aung-a thinrim chuan a chempuiin Malsawmsangi hi a nghawng leh a malpuiah a sat a, a nupui chhan tumtu Lalmuanpuia chu a khup dinglamah a sat zui a. Min Aung hi tlanbo zuiin, Hmunhmeltha phaia thlam pakhatah manin Champhai Police kuta hlan a ni.
Tualthah tum thubuaiah kum 7 chhung lung in tang tur leh Rs. 2,000 chawi turin court chuan a ti a, na taka mi a hliam avangin kum 3 chhung lung in tang tur leh Rs. 1,000 chawi turin a hrem bawk a, a hremna hi a hran ve ve-a kalpui tur niin, kum 10 chhung lung in a tang dawn a nih kha.