Inrinni zana PS Muanga, Champhai Bethel veng tualthih chungchangah mi 7 Champhai Police in an man tawh.
Inrinni zan khan PS Muanga kum 28 mi, Champhai Bethel veng chu Chhangphut Field Pavillion atangin a tla a, Damdawi in panpui a nih laiin a thi a. He thihna thleng chungchangah hian insual rawnna a thleng ngei nia hriat a ni a. A mawhphurtua puh mi pakhat Lalruatthara, Champhai Kanan Veng ni-a insawi chu Inrinni zan khan Champhai Police kutah a in pe a; Champhai Police-in an chhui zuina kal zelah thu zawhfiah turin mi 6 an man belh leh tawh a, thu an la zawtfiah mek a ni.
He thihna thleng chungchangah hian nunna chan PS Muanga nu chuan Champhai Police station-ah FIR a thehlut a, MZP Hqrs Champhai chuan an Executive member PS Muanga thihna chungchangah hian thil fel tawk lo a awm ngei nia hriaiin Champhai Police Station-ah a thihna chhan dik tak chhui turin ngenna an thehlut a, pawi khawihtute chu an phu tawk hremna an hmuh theihna tura a tawp thlenga hma an lak tur thu an sawi bawk.
Champhai Bethel VC pawhin thuchhuah siamin Thil tisualtute dan anga an chunga rorel a nih ngei theihna tura hma an lak chhunzawm zel tur thu an sawi ve bawk.
Maipawl thu dawn danin PS Muanga leh kutthlaktua pu Lalruatthara te hi tun hma lamah inhmuh thiam lohna an lo nei tawh a, hemi zan hian phone hmanga incho pawrhin Chhangphut Field-ah hian an inhmu a, PS Muanga hi thleng hmasa-in Lalruatthara leh a thiante hian Chhangphut field panin he thil hi a thleng zui ta a ni.