PS Muanga thihna chungchangah Case i/o in ni 90 chhunga Chargesheet a theh luh loh avangin Champhai Bethel Veng mipui lungawi lo Police Station kawtah an pungkhawm

Maipawl July 4/2025 : Kumin March ni 29-a PS Muanga thihna chungchang chhuitu Case i/o in huntiam chhunga chargesheet a theh luh loh avanga pawikhawihtute Court-in bail-a chhuah a phalsak ni-a ngaiin Champhai Bethel veng leh zirlai pawlte chu vawiin khan Champhai Police Station tualah an pungkhawm.

Bethel veng khawtlang chuan hun tuam ni 90 chhung a ral hnu pawha vawiin thlenga Case i/o in Court-a chargesheet a la theh lut lo chu Bethel veng mipui zah lohnaah an ngaih thu sawiin ni 97 chhungin case i/o hian engnge a tih tih chu an zawhna a nih thu an sawi a. Court-in pawikhawihtua puhte chungchang rel tur phek khat pawh an la hmuh loh avangin bail-a chhuah an dilna Court-in a phalsakah ngaiin lungawi har an tih thu an sawi a.

Vawiin hian mi pakhat inthlahdah avanga pungkhawm an nih thu sawiin Police station tha lawmman dawng tawh Champhai Police-in mi pakhat a mawhphurhna hlen lo avanga an mualpho chu pawi an tih thu an sawi a, hun tiam chhunga chargesheet thehlut thei lo case i/o chungah pawh action la se an duh thu sawiin mahni mawhphurhna ngai pawimawh lo police chu thawk zel tlakah an ngaih loh thu an sawi bawk.

Champhai Bethel veng khawtlang chuan mi hausa leh mirethei thliar hranna ni-a an ngaih thu sawiin inthliar hranna awm loa hmalak an duh thu an sawi a, PS Muanga tualthih chungchangah hian rorelna dik an phut a, pawikhawihtute hian an phu tawk hremna an hmuh theihna turin a tawp thlenga hma an lak zui tur thu sawiin a ngawi mai mai dawn lo tih an sawi a, Court-in bail a lo phalsak tawh pawh sut leh ngei turin an phut thu sawiin pawikhawihtua puh chhungte pawh bail dil lui lo hram turin an ngen bawk a ni.

MZP Hqrs Champhai chuan an thawhpui PS Muanga thihna chungchangah hian chargesheet thehlut turin case i/o an nawr ngar ngar thu sawiin vawiin thlenga thehluh a la ni lo chu hriatthiam har an tih thu an sawi a, PS Muanga thlavang hauh hian an ngawi mai mai dawn lo tih sawiin a tawp thlengin a thlavang an hauh dawn tih an sawi a, mi dang case la tur Champhai Police zingah an awm lo em ni tih chu an zawhna a nih thu an sawi bawk.

Champhai Police hotute chuan he thil thleng chungchang hi a chinchhuaka chhui chhuah a nih tur thu khawtlang hruaitute an hrilh a, mipui pungkhawm hi a tin leh ta a ni.

Champhai Police Station atanga Maipawl thu dawn danin chargesheet a thehluh hun chhung tura bituk chu June ni 29 a ni a, Case i/o hian chhui zui tur a la neih avangin June ni 19 khan Court-ah chargesheet theh luh hun chhung hi pawh sei a dil a, Court hian thlakhat chhung hun a pek belh a ni.

PS Muanga hi Kumin March ni 29 zan khan Chhangphut Field Pavillion atangin a tla a, a hliam tuar loin a thi a, he thil thleng chungchangah hian insual rawnna a thleng ngei ni-a hriat niin Champhai Police Station-ah FIR theh luh a ni a, pawikhawihtua puh mi 9-te chu man a ni.

PS Muanga thihna chungchanga mawhphurtua puh mi 9 te chu;

1. Lalruatthara s/o Zamawia, Champhai Kanan,
2. Vanlalpeka s/o Zamawia, Keifangtlang
3. Lalhriatpuia s/o Thantluanga, Champhai Vengthlang,
4. Johnny Lawmsangpuia s/o R Thankhama, Champhai Electric Veng,
5. MC Zohmangaiha s/o MC Thangthuama Keifangtlang,
6. Lalrinenga s/o Zonunsangi, Keifangtlang,
7. Zarzoliana s/o Lalrintluanga, Champhai Kahrawt,
8. Lalfakmawia s/o T Lalenzuala, Champhai Tlangsam,
9. Lalrinmuana s/o Zoramnghinga Hmunhmeltha