Pawl 10 exam 2024-a Social Science Subject Question set tu chu Suspend a nih thu School Education Minister Dr. Vanlalthlana’n Vawiin khan Assembly House-ah a sawi.
School Education Minister Dr. Vanlalthlana chuan Kumin 2024 MBSE hnuaia Board exam kaihhnawihah subject pakhata suggestion leh exam zawhna inang tam lutuk avanga statement siam a ngai ta chu School Education Department leh Mizoram Board of School Education (MBSE) chuan pawi a ti tak zet tih sawiin March ni 8, 2024 tlaiah HSLC exam-a Social Science subject-ah, Board exam-a zawhna lo chhuak thei awmte rinlawkna (suggestion) ang chauh ni si, Board exam zawhna nena inang deuh vek chu Govt. Mizo High School zirtirtu pakhatin a zirlaite hnenah a pek thu social media- ah a darh tih hriat a nih veleh MBSE hotuten hma an la nghal tih a sawi a.
Minister sawi danin He thil hi Govt. Mizo High School zirlai pakhat hnen atangin a chhuak tih hriat a nih hnuah MBSE chuan MISSTA President, Govt. Mizo High School Headmaster leh zirtirtu inhnamhnawih ni-a rin chu ko nghalin, thu zawh an fiah a, Zirlai naupangte pawh thu zawh fiah leh niin Govt. Mizo High School zirtirtu hian suggestion chu a lo pe ngei a ni tih finfiah a ni ta a. He zirtirtu hian naupang zirnaa chak lo bik deuh thenkhat, a hrana zirtirna (special class) neihpuiin, suggestion darh chhuak ta hi pein, zirlaite hian an lo ziak thla hlawm a. Zirlaite’n an lehkhabu-ah suggestion an lo ziah thlak pawh evidence atan kawl that a ni.
Minister chuan Dikhlel taka Social Science subject a suggestion petu zirtirtu hian sawrkar hnathawk a nih anga sawrkar dan a zawm loh avangin a chungah action lak nghal niin a hna atangin suspend a nih thu a sawi a, MBSE pawhin Police Station-ah FIR an thehlut nghal a, School Education Department pawhin Disciplinary Proceedings an la chhunzawm dawn niin a sawi bawk.
School Education Minister chuan vawiinah hemi chungchangah ngaihtuah hian Examination Committee an thukhawm nghal dawn tih sawiin hemi paper bika hmalak chunzawm dan tur an ngaihtuah tih a sawi a, MBSE hnuai pawl 10 exam chu routine pangngai angin a la kal chhunzawm dawn tih a sawi bawk.