Pyongyang-a hnuchham chawmna in chu Kim Yong hian a hriat theih hmasak ber a ni. Khawi lam mi nge a nih tih te, tunge a nu leh pa tihte chu engmah a hre lova, an ram hruaitu ber Kim Il Sung chu pa angin a en tawp mai a ni.
Korean indo zawh hlimhlawl a ni a, hnuchham tam ber chu he indonaa thi taten an kalsante an ni a, a thawk hmeichhiate pawh khawtlanga tuitla tawh lo tur, indonaa pasal sunte an ni tlangpui. Kum li mi a nih thlengin chu hnuchham chawmnaah chuan a awm a, hnathawk zingah indonaa a fa sun tawh Kim Hye Haw chuan a enkawl deuh ber a, nu ang maiin a ngaina nghe nghe. Tlai khat chu Russian siam lirthei manto tih hriat tak maiin hnuchham in chu a rawn tlawh a, a chhung atangin nu la upa lem lo, nalh taka inchei chu a rawn chhuak nghal chiah bawk a.
Fahrah naupangte a enkual dan dan hnuah Kim Yong leh a aia naupang hmeichhe pakhat chu fa atan a rawn la ta a. Hnuchham Kim Yong chu North Korea-a chhungkaw thiltithei takte fa a ni ta a. A nu leh pa dik tak ni turah a ngai nghe nghe. A pa thar chu sorkara mi pawimawh tak han tling pha a ni a, a nu chuan dawr lian tak a enkawl ve thung a. North Korea hausak lai a la ni a, an nun chu a nuam kher mai. Kim Yong pawh kum 12 a nih thleng chu hreawm tuar miah lovin a khawsa a ni.
Mahse zan khat chu a nu leh pate titi a hre ru a, kan rila rah ni lo mah se hmangaih takin kan enkawl zui tur tho alawm tiin a pa chuan a nu a hrilh a. Fa lak chawp an ni tih a inhre chhuak. Kim Il Sung-a khan an rama mi awmthei leh mi pawimawh deuhte chu indo avanga fahrahte enkawl a, fa atana la turin a rawn a. An nupa hian fa an la neih loh bakah sorkar tlaktlumna atan fahrah pahnih an enkawl a lo ni.
Kim Yong-a’n a nu leh pa dik tak an ni lo tih a hre chhuak chu in chhungah a hlim ta meuh lova, chuangtlaia inhriatna a nei zui ta bawk a. A awmdan chu hrethiamin a pa chuan sipai school-ah a duh a nih chuan lut turin a sawm ta nghe nghe a. A lo remti nghal thlap a, in chhuahsanin chu chu a nu leh pa, nuamsa taka amah enkawltute a hmuh tawpna a ni.
Sipai school-ah chuan inenkawlna a khirhin chhel a ngai hle a. Mahse fahrah chawmnaa lo tal tawh tih takah Kim Yong chuan harsatna tehchiam a nei lo, pa lian tak ni lem lo mah se rilru huaisen em em, thih thlenga tang ngam tur chi a nih avangin an zuam sual chawk a ni awm e. Kum 1978 ah khan sipai school atanga zir chhuakin thingtlangah captain hna a va thawk zui a. Chuta tang chuan thil siam chhuahna vil turin khawpui lamah a insawn leh a. Hna a thawh that em avangin ram dang nena insumdawn tawnna lam viltuah a tang zui leh a ni.
Thil siam chhuahna hmunte chu North Korea National Security Agency te thuhnuaia awm vek a ni a. A viltu tur pawh anmahni ruat niin an thawh that dan a zirin an kaisantir thin a. Nampo khuaa a inbenbel a, nupui a neih meuh chuan Lt Col ah a kaisang tawh a, mahse sipai tak tak People’s Army ah erawh a tel tihna a la ni lova, kaisang zel turin chuta a luh chu a ngai dawn tlat a ni. A nupui nen hian fa pahnih, mipa leh hmeichhia an nei a ni. Nampo-ah hian Japan nen chawhmeha an insumdawn tawnna chu a vilzui deuh ber a. Ram dang atanga pawisa lutte hi sipai inrelbawlna atan an hmangin an ram economy tluchhe tan mek tana a hnuk a tling pha a, a company vilzui phei hi chuan dollar maktaduai 1 chuang kum tin an thawk chhuak thei a ni.
An hruaitu Kim Il-Sung-a thih hnuah a fapa Kim Jong-Il chuan thuneihna a rawn chelh a, an ram sum leh pai dinhmun chu a chhe tan ta a, tampui mitthi an hmachhawn zui ta a nih kha. Eitur a van em avangin mihring sa eite pawh an awm nual a. Kim Yong pawh hian a tak ngeiin a hmuhpui hnem viau. An chhungte ruang chu an hlep a, thenkhat phei chuan buhfai leina atan sa pangngai ang tein an zuar chhuak a ni awm e. A awm ve reng kum 1980 chho atangin an rama ration an pek chhuahna, mi nawlpuiin chaw an hmuhna pui ber chu khar a ni daih tawh a. Mihring sa ei mai loh chu tih ngaihna a awm tawh lo.
Mahse tam chuan Kim Yong leh a chhungte chu a la thleng pha lo, a company vil la chet that hram hram vang a ni ber. Hetiang lai hian Kim Yong hian a chhungte, a pianna nu leh pa chu a zawng ru reng a, hnuchham chawmna ina amah enkawltu Kim Hye Haw chu kum 30 chuang hnuah a va hmu leh a, Daepyeong khua atanga an dah a ni tih leh a rawn dahtu hming chu record hlui a hai chhuah atangin a lo hrilh thei a. Chu khua chu a va pan ta a ni.
Hnuchham chawmna ina dahtu a va zawn chhuah chuan a putea a lo ni a, thil siamchhuahna hmuna thawk a ni. A hnathawhnaah a va hmu a, hnuchham chawmna ina dahluh a nih chhan engkim a hre chhuak ta. Korean indo lai khan a pa chu sumdawng thin a ni a, South Korea lam pawh a tlawh fo a ni awm e. Indo a zawh hnu lawkah North Korea sipaite chuan America enthlatuah puhin an rawn man a, mipui hmuh laiin an tihlum ta a. A chhungte erawh chu an him thei thung.
North Korea-ah chuan an ram hmelmate chu an chhungte nen lam an hrem thin laiin a nu leh pa hi an lo inthen hman tawh a, chuvangin a nute lam chu an him theih phah ta a ni. Mahse a fate erawh chu an him dawn loh avangin hnuchham chawmna inah an dah ta a lo ni a, Kim Yong-a u pawh hmuchham chawmna in dangah an seilentir nghe nghe.
North Korea-ah chuan an kaisan dawn reng rengin NSA te chuan an chhungkaw chanchin an chhui chhuak thin a, ram hmelma an lo awm tawh em tihte chu an dap kual thin a. Hei hi an ram thuruk venhimna chi khat atan an hmang. A u hian kum 1986 ah khan a kaisan dawn avangin an chhungkaw chanchin chu a rawn chhui ve a ni awm e. America tana enthlatu fapa a ni tih hi a hre chhuak a, a u hi North Korea khua leh tui tha, hnathawk kawnga entawn tlak tak mai ni mah se a tan thihna bak chu kawng dang a awm lova, North Korea atanga relhru turin ruahmanna a siam ta a. Mahse ruahmanna a siampui zingah sorkar enthlatu a tel ve a, a thil tum hi puanzar niin a u chu ram phatsan tumah an puh a, mipui hmuh laiin an lo tihlum tawh a. A kaisang dawn a nih chuan chu chu Kim Yong pawhin a la paltlang tur a ni. Mahse a putea chuan engkim lo chinfel a tiam a, a nu hmu lo tur leh a chanchin engmah rawn ngaihven tawh lo turin a thlah a, chu chu a tana thil tha ber a ni, a ti.
Kum 1989-ah a hnaah chuan a kaisan theihna remchang a inhawng a, a chanchin pawh chu an chhuizui ta chiah mai. Mahse a putea khan ruahmanna a lo siam lawk tawh avangin America enthlatu fapa a ni tih chu an hrechhuak mai lo. An pu phei chuan Kim ni lovin Park zawk alawm i lo nih reng, a ti nghe nghe a. A putea’n a chanchin a thupsak chu hetiang deuh hi a ni: Kim Yong hi a nu fapa ngei a ni a, mahse a pa erawh chu enthlatu ni lovin an khuaa communist martkar Park Bok-deok a ni a, a khawilai fa a ni. Nupa inkara ni lova piang a nih avang hian Park-a fa anga ziahluh a ni lova, finfiah turin Park lah chu South Korea sipaite kutah a thi daih tawh.
A chanchin rawn chhuitu officer lah chu a putea hian a lo tham bawk nen, a nihna chu thup theih ngei an inbeisei hle. Kim Yong pawhin a chanchin hlui rawn chhuitu hi TV, Fridge leh Rice Cooker tih bawr vel a lo pe ve nghe nghe a, tunah chuan North Korea sipai, People’s Army-ah a lut ve tak tak thei dawn a ang ta hle.
Kim Il Sung-a piancham lawmna atan khua leh tui thate chu kaisantir thin an ni a, kum 1993-ah kaisantir turah chuan Kim Yong-a hming pawh chu chhawp chhuah a ni ve ta a. A chanchin hlui record chuan NSA kut a thlen a ngai ta tihna a ni. Engkim fel tawha an ngaih chu a lo fel lo tawp. NSA lam hian Park Bok-doek-a fate, Pyongyang-a hna sang tak tak chelhte chu nu hrangah unau in nei em tih an zawt ta hlauh mai a. A pain khawlai fa a neih loh thu leh, an hriat theih chinah mipa pahnih leh hmeichhe 1 an nih thu an sawi a. A palina anga an ziah chu an hre ngai lo.
Chu chu Kim Yong-a putea leh a nu ten an ngaihtuah tel loh leh an ruahman miah loh, an hnu thup kawnga a pawp lai chu a ni. NSA hian an zinga tel tur chuan zaa zain an chhungkua an communist tur a ni a, sawiselna lai a awm tur a ni lo tih chu an thupui a nih avangin Kim Yong-a chanchin chu an chhuikir leh ta a. Hriatpuitute thu an zawhfiah atangin an dawtsawi chu hai chhuah a niin Kim Yong chu enthlatu fapa a ni tih an hre chhuak ta.
Man a nih ni chuan a fate chu school an kal tawh a, a nupuiin hnaa a kal tur chu pawn thlengin a thlah a, hna pawh pangngai takin a la thawk. A haw tur erawh chu a lirthei a lo awm tawh lova, a aiah police an lo intlar tawh thung a. Man a ni tih lehkha, Kim Yong Il-a’n a hming a ziahhnan ngei mai chu an lo hmuh nghal a, America tana North Korea enthlatua puhna, an ram phatsannaah pawh thubuai sang berte zinga mi an awrhtir a ni. Police te chuan NSA kutah hlanin thla khat leh a chanve chhung an dawp ta a, i pain eng thu nge a hnutchhiah che? America hnenah eng thu nge i thlen tawh tih bawr velte chu an zawhna a ni a. Mahse khua leh tui tha, North Korea communist sabela chhum hmin thlap tan chuan chutiang chu dawt pawha han chhan theih a ni lo. Engtiang pawhin a thiam thu sawi ve mah se a chungthu chu rel fel a ni tawh a, thih nge hreawm taka damtir tih mai chauh a ni.
Thla khat leh a chanve chhung hian ni khatah darkar hnih khat bak a mu ngai lova, chaw an pe meuh loh bawk avangin a cher chak hle a. Kutthlak leh indawpna hrang hrang a paltlang nasa bawk nen, thih chu a thlang zawk rum rum ta awm e. Mahse chu chu a thil tawn tura hreawm hmahruai chauh a la ni. Hetiang lai hian a nu leh a putea te pawh an man nghal a, labor camp lamah an dahlut a. A nupui fanaute dinhmun chu hre lo mah se an inhrem dan atangin an nuamsa hle ang tih a hrethiam nghal a, an thi nge an dam tih pawh Kim Yong chuan a chiang ngam lo. A chanchin chhuitu officer pawh kha man niin lungalhthei laihchhuahna khurah hna an thawhtir a, a hnathawhna hmun pawh thian thianghlimin an company viltu ber Dae Uk chu a hna an tihhniamsak bawk.
Thla thum leh a chanve hnuah an khunghranna atang chuan an hruai chhuak a, tlangin a hual hmun pakhatah an panpui a, Kim Yong chuan min that ngei dawn a nih hi tih rilru a pu a, chaw ei mumal lo leh mut hmu tlem bawk si tan a nih avangin a taksa chauhzia chu pawn an chhuahpui hian a inhrethiam chiah a ni. An hruaina chu bangin a hual, a chunga thirhling leh searchlight an vuahna a ni a, rim taka hna an thawhtirna hmunah an hruai a lo ni. Mi dah thar turte an dawnsawnnaah chuan chaw ningnawi tlem a zawng an pe a, chu chu kum tam tak chhunga a thil eitui ber a ni zui ta a. A thil eizawhah chuan tan in lamah an dahlut ta a, mahse a pindana kalh khum lovin lungalhthei laih chhuahna khur lama tirh luh nghal a ni. An khunghrannaah khan a rihna a hloh nasa tawh hle a, mahse mi tang lo awmsate ngaihtuah erawh chuan thau tak a la ni a, tang zawng zawngte chu vunin an ruh a khuh ve tawk tawk tih tur khawpa cher an ni a, lungalhthei an khawihna lamah an balin ni an hmu tha lo tih chu an vun atangin a hriat hle bawk a, mitthi kal thei tih mai tur khawpin an landan chu a hmuhnawm loh a ni.
Chung mi tang zingah chuan Kim Yong chu hna thawhtir nghal a ni a, lungalhthei an laih chhuah tawh, nawrlirha nawrtuah tangin chu chu a damchhung hna a ni dawn ta. A ni khat ni-ah chuan a chau khawp mai, lungalhthei nawr chu hrisel tha leh ei hmu tha pangngai tan pawh tih fe tham a ni a, mahse anni chaw atana thil tuihang, a rim nam tawk tawk, vaimin leh wheat chhumpawlh tuiril tak mai, tuina nei miah lo ringawt ei tan phei chuan thih thaa tan a ngai a ni.
An dahluhna hi an ram tan ina a hreawm ber, Camp number 14-na a ni a. A hreawm thei ang bera thi tura an inchhawrna hmun a ni. An ram phatsantute leh pawikhawihtute, politics thila thiam loh an chantirte an dahkhawmna a ni a. North Korea-ah chuan mi pangngai nih chu retheih kumkhuana a ni a, politics-ah sang takah invawrh nise, an tlak erawh chuan camp no 14-na chu an chan tur a ni thung a. Mi thiltithei nih pawhin hmelma insiam loh te a ngai hle.
Camp no 14 chu nung chunga inphumna hmun a ni a, zing dar 5-ah thovin dar 6-ah chuan tukthuan an eikham tawh a, nilenga hnathawk tura khalhkhawm an ni tawh thin. An hnathawhna chu leihnuai feet 2000 chuanga thuk, ni eng reng reng lan lohnaah a ni a. Dar 7-ah chuan leihnuaia lungalhthei lai chhuak turin an thleng thla tawh a. Dar 12:30 atanga dar 1 inkarah chaw chhun eiin an chawl ve zawk a, chu pawh leihnuaiah vek a ni a. Hnathawhnaah inthiar duh an awm chuan eng pakhat chiah an neih avangin an innghak khawm thin a. Dar 1 atanga zan dar 11:30 thleng rim takin hna an thawk a, pawn thim tham karah zanriah an kil leh a ni.
An ram danah chuan dar 8 atanga dar 9 inkarah tangte chu an mu tur a ni a, mahse camp no 14-naah chuan chu dan chu an zawm lem lova, zawm a nih leh nih loh pawh tumahin an rawn enghelh ngai hek lo. Dar 11:30 atangin tangte chu an khalhkhawm a, an ram thurin inzirtirna leh mahni insawiselna hun te an hmanpui leh a, an mut meuh chuan dar 1 a lo ri thuak tawh a, ni khatah darkar thum bak an mu ngai lo.
Vengtute chuan tang, dam tawk tawkte chu dimna tel miah lovin tihsual hote an neih chuan kut an thlak a, an nunna lak pawh thil engtham mah a ni lo bawk. Venhimna a khauh bakah tangte hi an hah leh an chauh em avangin he tan in atang hian tumah damin an la tlanchhuak ngai lova, intihhlum duhna te chu nei thin mah se hun leh hmun a awm lo a ni. Chhungkuaa he tan ina lutte chu mipa leh hmeichhia thliar hran an ni a, naupangte chu kum 12 an tlin thleng an nute hnenah an awm a, hnathawk turin mipa awmna lama sawn an ni zui ta thin a. Chhungkua pawh mi tihhlum an neih a, tang an punkhawmtir bak lo chuan an inhmu ngai lova, an thi nge an dam tih pawh an inhre meuh lo a ni.
Kim Yong-a tan ve hma kum thum kalta, kum 1990-ah khan tangte hi an retheih em avangin helna a chhuak a, vengtu 7 vel an thi a. Vengtute hian a chhanletna atan mi tang 1500 vel chu thil laihchhuahnaah hian an khawm a, lung an tihpuah hnan ta a. Tangte lakah hian an nunrawng zual a, mahni ualau taka intihhlumna erawh a thleng tlem deuh tawh. An tihhlum turte chu an la hrang a, an kir leh tawh ngai lo.
Pindanah chuan mi 60 vel an dahkhawm a, an chep em avangin a mu hmasa apiang an vannei a, insi chet lo chuan a mut theih ngai loh. Chutah chuan darkar thum chhung an hahchawl ve thin. An pindanah chuan inthiarna tur bucket an chhawp a, chu chu an vaiin an intawm thin a. Tang lut tharte chu bucket bulah chuan an muttir thin. Eng a chauvin thil a hmuh that theih loh a, bucket bula mi hi chuan zun leh ek a kai changte pawh a awm nawk zel.
Mutna atan chhuat charah chuan engmah an phah ngai lova, mahse intihlumna atan lungalhthei a tam avangin thlasik vanglai pawhin harsatna lutuk chu a awm lem lo thung. Nilenga lungalhthei khu hip an nih avangin tangte chu an thawk kawk kawk hlawm a, ni hmu ngai lo tih takah an vun chu a dawldang em em bawk a. Thla khatah vawikhat an lu mehsak ni mah se an inbual khat avangin an hreu bem bum hlawm bawk a. An dam chhung chu a hreawm thei ang berin an chhiar liam, thih chu an tan malsawmna dik tak a ni zawk awm e.
Vengtute hian hnathawhna kaihhnawih a nih loh chuan inbiak an khap tlat bawk a. Kim Yong phei chuan a luh atanga thla 1 chhung chu tumah a be lova, at a awl dawn hle. Tang 3 zinga 1 ang zel chu vengtute hian enthlatuah an hmang a, mi tang zingah pawikhawih zawnga ruahmanna nei an awm em tihte an thlithlai thin a, chung mite chuan hna awlsam zawk leh eitur tlema tha deuh zawk an dawng let ve thung.
Nitina an hreawm hmachhawn zingah chuan riltamna chu tawrh har ber a ni awm e. An chaw dawn a tlemin chakna a pai mang lova, a rim thei ang berin hna an thawk leh thung a. Riltam reng rengin ni an chhiar liam a, eitur awm thei angte han dap thin mah se a vang khawp mai. Hei vang hian chokaa thawh leh vawk enkawl chu hna duhawm berah an ngai a. Chokaah chuan vaimim tlem an ei belh thei a, vawk enkawltute pawhin an riltam tawpkhawkah vawk chaw an ei thei bawk a, chung hna chu enthlatute thawh atan an dah thin.
Hnathawhnaa muang leh thawk tha lo an awm a nih chuan na taka kutthlak an nih bakah an chaw dawn tur chu a zatvea tihhniamsak thin an ni a. An chaw dawn a tlem tawh laia han tihtlemsak leh ngat phei chu riltama inthihtir tumna ang vel a ni awm e. Tum khat chu Kim Yong hi a hnaa a muan avangin a chaw dawn an tihtlemsak a, kum upa tawh lam a tanpui pakhat chuan a eitur a sem thin a, chuti chung chuan tam hnem pawh a tling pha chuang lo. Heti reng reng chuan tiin intihhlum dan turte pawh a dap ta hial a ni.
Tan in chhungah chuan intihhlum ngaihna a awm lova, hnathawhnaah intihhlum dan tur a dap ta a. Leihnuaia an luh thlakna atan bawm an siam a, an luh leh chhuah dawnah te, lungalhthei khai chhohna atan te an hmang a, mihring tha vek a ngai thung a. Zan khat chu an hnathawk zo a awm khawtlai hret a, an inkhai chhuahna bawmah chuan amahin a chuang a, pawn lam a thlen hma hretin bawm an thlunna hrui chu a phelh a, feet 2000 vela thui a lum thla a. Ni khaw hre lova awmin a thi lo thung. A harh leh chuan thisen karah a lo mu a, midangin a lo buaipui laih laih a. I thi lo hi thil mak a ni e, an ti hial. Khatia feet 2000 vel a lum thlak khan bawm insawi chuan kawr te-ah a lo theh chhuak daih a lo ni a. A tum aia nain a tla ta lova, a hliamte chu na viau mah se thihpui tham a ni ta lo a ni.
Lungalhthei khura thawh bakah hian kawng siamthat tur a awmin pawn lamah an thawk ve zauh zauh a, boruak thianghlim dawn tur a awm avangin chu hna chu an thlahlel thei hle. Kawng an siam tum hian Kim Yong chuan mingo pahnih an tang ve tih a hmu chhuak a, eng vanga tang nge tih chu a hre hauh lo. Korean indo hunlaia mite an nih loh vek chuan khualzin, an ram enthlatua an puhte ni turah a ngai a ni. Kawng siamnaah hian tan ina a luh atanga a vawikhatna atan hmeichhia pawh a hmu ve a, an cher em em ringawt mai a. Mahse mipate ai chuan an lan mai danah an hreawm nep zawk tih a hmu thei a ni.
Mahni in sawiselnaah khan an chanchin chhe lai leh ram tana pawimawh sawi chhuak an awm chuan vengtute hian eitur an pek belh thin a, mi tam takin vaimim plate khat dawn belh duhin insawiselna leh inpuanna dik lo an phuh chhuah phah nasa hle a, an thil puan chuan a hnuah hremna kengtel leh thin mah se riltam ai chuan an thlang zawk a ni. Sazu leh thil dang han ei theih tur a awm meuh lova, thil laih chhuahnaah chuan an hmu fuh a nih pawhin an leihnuai kawng verh chim leh chim loh hriat theihna pawimawh tak a nih thin avangin phal ngai lova, mahse an hmuh fuh tawh chuan an tihhlum a, a helin an ei vek thin. Chu aia thil tui chu tan inah a awm lo.
Tum khat chu tang pakhatin an hnathawhnaah rul a hmu fuh a, lunga a chhut hnuah a mei lam chu a ei ta nghal a. Mahse rul hi a thih chian loh avangin a rawn chuk a, a mei lam chu a la ei zui tho. A thiante chuan a lu lam chu an han chhu leh a, an inchhuhna lamah an pawtsawm hneh khawp mai. Rulin a chuk ni hnih hnuah a thi ta nghe nghe. Bawng ekah a thil ei pai tawih loh a awm mial lo maw tia hai chang an nei a, khau atanga hrikhrah thlengin a ei theih ang apiang chu an ei thin.
North Korea-ah hian Kim Il Sung leh Kim Jong Il te pianchamah eitur an sem thin a, mahse camp no 14-naah erawh chuan an thil dawn chu a danglam tlem khawp mai. Bean, a hriak an sawr fe tawh, thial rual lova chang leh ran pek tur chu an dawng tel thin a. Chu chu an tan erawh thil lua a ni. Eitur dang dap belh hrim hrim chu phal loh a ni a, man an awm phei chuan kahhlum tur a ni.
Tan in chhehvelah hian thing a awm nual a, a rah thenkhat chu hung chhunga rawn tlak chang a awm a. Chu pawh chu an chhar thiang lo. Mahse riltam em avanga nunna thapa lo chhar tawk an awm a, an man zingah an kahhlum takte pawh sawi tur an awm nawk a ni. Tum khat chu an thil laihchhuahna khur a chim avangin mi 5 an thi a, an ruang dah chu a riltam zual thenkhatin ei atan tiin an lo hlep a, man chhuah niin kahhlum an ni leh bawk.
Nunhona dang leh tan in dang ang bawkin a chak leh chak lo inthliarna a awm ve tho bawk a. A chakte chuan chak lo zawkte an nek a, an eitur laksak changte pawh an nei thin a, a chak lo tan nun chu a khirh lehzual. Chubakah chuan pawn lam atanga tlan hrantir an ni a, khawvel ningkhawng engmah an hre lova, kum khatah rimawi tum hnih khat an hria leh an mamawh rawn phurluttu lirthei thawm bak chu pawn lam thil engmah an hre ngai lo a ni. Vengtute hi nunrawng tak tak an awm laiin a upa lam, ngilnei deuhte pawh an awm ve bawk a. A then chuan tangten meizial an zuk ve theihna tura a bung la nung hnutchhiahte an aw thin a. Chutiang tawng fuhte tan chuan vanram tlafual a ni ringawt mai.
Kum hnih chhung Camp 14-a hun a hman hnuah ni khat chu thuneitu lamin Kim Yong hi an rawn ko ta a, tangte chuan an dahtha tawh dawn a nih hi, an ti nghe nghe a. Ani pawhin a hun tawp a thleng niin a ngai. Lirtheiah an hlang a, pawnah an chhuahpui ta a. Khaw enga hun rei tak pawn lam a hmuh vawikhatna niin a hah te pawh a dam sawng sawng awm e. Lirthei chuan tlan zelin tan in dang an thleng a, camp number 14-na atangin a aia nuam deuh zawk, camp number 18-naah an sawn a lo ni a. Chutah chuan a nu pawh an khung nghe nghe a, kum tam tak hnuah a nu nen chuan an inhmu leh thei ta. A nu chu a cherin a phuai em em tawh a, tunge a nih tih pawh a hriat theih tawh meuh loh.
Camp number 18-na hi pawikhawitu chhungte an dahna hmun a ni a. North Korea hian an ram hmelmate chu chhuan thum thleng an hrem thin avangin chung an chhungte chu camp number 18-naah an tantir a, rim takin hna thawk mah se chaw an dawng tha deuh a, hung chhungah chaw an zawn belh theih bawk avangin tlemin nun a nuam deuh a. Riltamna erawh an hre lo tihna a ni lova, an hreawm hmachhawn lian ber a la ni tho mai.
An hnathawh dan pawh a inchen lo fur, nuho hian ran enkawl tih bawr vel an thawh laiin mipate chu thil laihchhuahna hmunah an thawk ve thung a. Politics avanga tang fanute phei chu an nihlawh zual. Hreawm hre ngai miah lovin he tan in hreawmah hian an rawn lut a, hna awlsam ber ber an thawhtir thin a. Mahse chung mite chuan zan lamah vengtute hnenah an zahawmna an hralh a ngai ve thung a. Vengtute chetdan sawi chhuak an awm chuan tlan chhuah tum anga lantirin an kaphlum mai thin.
An chhehvela thlai ei theih ang chi chu an la fai hneh hle a, thing pil nel deuh te pawh eiturah an thel thin a. Vawk vulh zingah vawk chaw hawn ruk te, vawk note piang hlim lo paipawn tawkte an awm bawk a. Camp number 14-na nena khaikhin chuan nuamsa tak chu la ni mah se tan in dangte nena ngaihtuah chuan rapthlak tak a la ni. Kim Yong chu a nu nen vaimim hnah leh tih bawr vela in an khawr chhawpah an cheng a, a pawimawh ber erawh chu Kim Yong-a’n a damchhunga a thlakhlelh em em nu a nei ve ta.
A nu chuan a sahimna atana hnuchham chawmna ina dah a nih dan te, inchhira nitin a hman thin thute a sawi a. A pa kha Communist dova South Korea sipaite puitu a nih ngei thu leh, America tana enthlak hna a thawh leh thawh loh chu a hriatpui lova, mahse America sipai pakhat kaihhruaina hnuaiah chuan a che chhuak ngai niin a sawi a. An dinhmun chu chhe viau mah se an nufa, kumkhuaa awmdun ngai lo chu in khatah an cheng thei a, kawng lehlamah chuan a hlimawm viau mai.
Hetia an awmdun theih chhan hi Kim Yong-a hnathawhnaa an pu vang kha a ni. An pu khan thuneitute hnenah Kim Yong hian eng pawi mah a khawih lova, a pa zawk kha enthlatu a nih avangin camp number 14-naa lut tur chu a pa a ni a. A fapa a nih avangin camp number 18-naa awm zawk tur a ni, tiin thu a thlen a. A chanchin hlui dik lova ziah chungchangah a patea thil tih a ni a, engmah inhnamhnawihna a nei lo bawk, tiin sawn a dilsak a lo ni a. Thuneitu lam hian ennawnin an remtihsak ta a, an pu hian thu a thlenah hian a nunna a thapsakna laite pawh a awm awm e.
A nu chuan an eitur dawn atangin Kim Yong-a tan a tam zawk a dahsak thin a, ka upa tawh nen, an thil sem hi ka paitawih hleithei lo a ti mai thin a. A fapa chu riltam lova awmtir a tum nasa hle. Hna a thawh loh chuan kal phal chinah hnim ei theih tura zawng thin a. Kim Yong pawhin hna a thawh loh karah an eitur a dap ve bawk thin a. Nun chu a ziaawm deuh. Camp number 18-naah chuan zing dar 7 ah hnathawk turin a chhuak chauh thin a, zanrei tak thleng hna thawhtir an ni tawh lo bawk a. Chhungkua anga an khawsak theih bawk avangin hreawm an tuar dan chu camp number 14-na ngaihtuah chuan nep tak a ni.
Camp chhunga nau piang, pawn lam khawvel hre miah lote pawh an awm nawk a. An pi leh pute pawikhawih avanga tuartute an ni a. Chung mite chu vawk vulhah an hmang deuh ber thin a. Tang tam zawk hi chu mi challang, Kim Jong Il-a laka tlatlum ta chhungte an ni tlangpui. An nun hi nuam zawk angin lang mah se vengtute hleilenna a nasa a, riltama an thihtirte leh tangte punkhawmnaa mi tihhlumte chu a hluar viau thung a. Chhungkuaa an rawn dahluh, an rawn thlen ruala a then an kahhlum tak te pawh an awm a.
Thenkhat chu thil siam chhuahna thawk, eitur leh an thil siam chhuah inthleng avanga an mante pawh an kat nawk a. Chung mite chuan an thil siam chhuah, sorkar ta chu eitur an neih miau loh avangin chhangphut ten an thleng a, sipaiten an in dapsakin chhangphut kawl reng reng chu tan inah hian an dahlut vek thin a, an chhangphut lah chu ran chaw atan a tlak vel ang tih tur chi a ni ta lehnghal a, riltam man a sang hle.
Pawikhawihtu chu a chhungte nena man vek a nih thin avangin chhungkuaa inthahna te pawh a thleng zeuh zeuh. Tum khat chu politics avanga an man mi pakhat chu a fate pathumin an that a, an chungthu an relsak chuan a fate hian ani avanga hreawm tuar kan ni a. Kan tihhlum hian kan hruaitu duh tak Kim Jong Il-a tana mi hnawksak kan thianfai a, ram tan thil tha kan ti zawk e, an ti a. A fate pathum hi mi tang zinga communist sabela chhum hmin leh theih turah ngaiin enkawlna tha zawk pek an ni a. Hetiang chiah hian hmeichhe pakhat chuan a pa a that bawk.
Mi thiltithei leh challang tak tak tanna a nih avangin vengtute chuan remchang an la thiam hle. Pawn lamah hmelhriat an la nei tha tih an hria a, chung mite chu a thlawnin an duh an inpektir thin. Kim Yong pawh ram dang pawisa thawk chhuak chi-a inhnamhnawih a nih avangin vengtu pakhatin tum khat chu a ko a, Pyongyang-ah ka kal dawn a, i thiante thu chah duh i nei em? tiin a zawt a. Kim Yong chuan, ka pu eng nge i mamawh a lo ti ve thung a. “Color TV ka mamawh ang”, tiin a vengtu chuan a chhang a. Kim Yong hian hnathawhnaa a thiante hnenah lehkha thawnin Color TV lo pe rawh u, tiin pek a tulzia a ziak tel bawk a. A thiante hian a kutziak leh a hming ziah dan atangin Kim Yong-a mi tirh a ni tih an hria a, tha takin an lo pe ve mai bawk.
Vengtu hian rulhletna atan Kim Yong chu vawk chaw tur vaimim ro an dahkhawmnaah a hruai a, tin khatin a ruhtir a, in lamah a dahtir leh a. A tul in tih danin in hmang thei ang, a ti mai thin. Ei rawh u chu a ti duh hauh lo, man chhuah nise a tan a pawi thei tlat. A chang leh a pindanah a ko lut a, bawlhhlawh bawm thianfai rawh tiin bawlhhlawh bawmah chuan eitur chi hrang hrang a do dahsak thin. Mahse vengtute hi an inthlak kual reng avangin chutianga hnung inhiah tawnna chuan rei a awh ngai lo thung.
Kum li chuang chutianga an khawsak hnuah tlai khat chu a nu a rawn haw ta lo tlat mai a. Dar 5-ah kir leh vek tur, a nih loh chuan tlan chhuah tum anga ngaih in ni ang tih chu dan a ni a, dar 5-ah pawh a nu chu a rawn kir ta lova. An zawn chuan tlangah ni khaw hre lovin a lo awm a. A eitur zawng, chaw ei tlem bawk si, taksa chauh avanga tlu niin a ngaih theih a, mahse tlan chhuah tuma puhin niin kawl an buntir a, an khaihlum zui ta a ni. Kim Yong chuan a nu thi lai hi a rukin a thlir nghe nghe a, khawvela ka thil tawnah chuan a hreawm ber a ni. Kha thil thleng khan ka thil tawn tawhah nitin min tibuai ber, a ti.
A nu thih atang hian tlan chhuah dan tur a ngaihtuah a. Hungna bang lawn liam chu awlsam ber turah a ngai a, mahse eitur hmu tha lo tan chuan bang lawn ringawt pawh chu tih fe tham a ni a, a kalkawngah thang an kam deuh zut avangin nunna thap a ngai dawn a ni. Lungalhthei an laih chhuahte chu rel hmangin hmun dangah thiar chhuah thin an ni a, lungalhthei kara bihruk erawh chu an chhuah dawnah thira nem muk vek thin a nih avangin a ngamawm loh thung.
Tan in bula lui pawh tlanchhuahna atan a remchang lo, hleuh turin tha a nei lova. Chubakah tui chhungah len an zar vek avangin han paltlang a huphurhawm hle bawk. Tlanchhuahna tur remchang ber chu gate pui ber atangin a ni. Zing dar 2 leh dar 3 inkarah vengtute an inthlahdul deuh a, mahse gate chu an kalh tlat avangin chahbi neih a ngai dawn a, ui kawlh an awm bawk nen, chung zawng zawng chu paltlang a tul a. Ruahsur zanah chahbi neih dan ngaihtuahin relhruk theih a ni ang, a ti a, chutiang tur chuan ruahmanna a siam ta a ni.
A chan loh khanah tlan chhuah theihna remchang chu a rawn insiam ta thung. Zan dar 7-a zanriah an eikhamah lungalhthei phur tur rel a rawn thleng a, lungalhthei chu an thiar lut ta a. Rel hi eitur phurhna atan a compartment thenkhat an hman avangin vaimim leh buhfai thenkhat chu a thlauh deuh nuai a. Chumi chhara midang an buai laiin Kim Yong leh a thianpa Son te chuan lungalhthei phurhna tur compartment chu an en kual a. Rel chu hlui ve thawkhat tawh, thawm that loh a nih avangin a chhuat a tlahniam hret a, mi pakhat leng tawk turin a chhuat pui tura thir phek khang inkarah chuan kua a awm a, lungalhthei nekna dawng lutuk lohvin a awm theih dawn.
A thianpa nen chuan an inen a, mi pakhat tan chauh tlan chhuah theih a ni a, a tu zawk nge ni ang tihah chuan engmah sawi lo mah se buaina a awm nghal Chutih lai chuan vengtute chuan tangte chu hnathawk tura hrilh nan hamrik an rawn ham tuarh tuarh tawh a. Compartment awmna chu a thim lai deuh a nih avangin Kim Yong te thiandun chu an rawn hmu thei lo thung. A thianpa chuan lut rawh le, lungalhtheiin ka rawn vur nghal ang che, a ti ta mai a, a thianpa chuan a zalen theihna chu a thianpa tan a hlan tihna a ni. Kim Yong chu a lut thuai a, chhuat phah puitu thir tlema a siamthat hnuah lungalhtheiin a vur a, a kalsan zui ta a ni.
Lungalhthei hlan chhung hi a rei hle, dar 7:30 vel atanga tanin zinglam dar hnih velah te an zo fel tawk thin a, chumi chhung chuan man chhuah a ni hman thei a, engpawh thleng thei a ni. Kim Yong chuan engmah ti thei si lovin hlauhthawng tak, thawk pawh thaw tha ngam lovin a awm a. Mahse lungalhthei an hlan zawh thleng pawhin eng buaina mah a tawk ta lova, tunah chuan a harsa lai ber a paltlang a ngai ta, chu chu nem mukna a ni.
Thir phek chuan lungalhthei chu a rawn nem ta a, nekna chu a nat em avangin Kim Yong chu a thawk pawh a thaw hleithei lova, a thlanfim a dir zawih zawih mai. Nekna chu a ziaawm deuh a, a la dam, rel chu a insawi a, muang changin a tlan chhuak ta a. Kim Yong chu zalen turin camp number 18-na atangin a phur chhuak ta a ni.
Rel chu a chawlhhmunah rei ngial a ding thin a, Kim Yong chuan a tlan chhuak tih hriain an zawng a nih te a ring rum rum thin a. Mahse chutiang em chu a thleng ta lo hlauh. A hnathawhna thinah khan a zin kual tam avangin rel chuan chhimthlang lam a pan tih a hria a, South Korea, China leh Russia lam pan tur erawh chuan chumi ep chu a pan a ngai dawn a, relah chuan a chuang reng thei dawn lova, Go-on khuaa chhuk a tum a. Zing dar 4-ah chu khaw rel chawlhhmun chu an thleng ta a.
Lungalhthei kar atang chuan in hai chhuakin pawnah a vak chhuak a. A bula luiah chuan a bal zualpui a tifai a, a hlimthla a zuk hmu chu amah tih hriat tawh loh khawpin a lo hmelchhe zo tawh a, mihring ni lovin mitthi ruang a ang mah zawkin a inhria a ni. Rel chawlhhmuna hnathawkte thawmhnaw hnutchhiah a lo awm hlauh bawk a, a intihfai hnuah a tang thawmhnaw hlipin hnathawkte thawmhnaw chu a inbel a, Choengjin lam pan tur relah a chuang ta a. Chu chu kum 1999 kha niin an ram dinhmun chhiatzia leh, tan in leh pawn lam chu retheihna lamah a danglam bik lohzia chu a tak ngeiin a hmu a. A tan hma kha chuan hetiang em em hi an ni bik lo, mahse an ram chuan chhiat lam a pan zel a lo ni.
Sipaia a lo tan tawh avangin a tlan chhuah atanga ni 10 chhung vel hun a nei tih a hria a. A tlan chhuak tih an hriat hnuah vengtute chuan NSA hnenah thu an thlen ang a, anni hian dakin a thlalak leh man duh a ni tih chu ram pumah an thawn chhuak dawn a, inbiakpawhna lama an la pachhiat em avangin chu chuan ni 10 chhung vel tal a awh dawn a. Chulai chu a tan North Korea ram atanga tlan chhuahna tur remchang chu a ni a. Chumi hnuah erawh chuan khawlaia veivah pawh a tan a ngamawm tawh dawn loh a, Cheongjin chu a hma thei ang bera a thlen a tul a ni.
Sipai school atanga a thianpa pakhat chu Cheongjin-ah hian a khawsa a, thian an lo nih tawhna bakah an hnathawh hnuah an chhungkua a lo puih fo tawh avangin a puih duh a ring a, chuvanga he khua hi va pan a ni. A in kawngka a va kik chuan a thianpa chuan a landan atangin harsatna lian tak a tawk tih a hrethiam nghal a. Kim Yong chuan hnaah harsatna a tawk a, North Korea chhuahsan a ngaih thu a hrilh nghal a. A thianpa chuan dawt tih hre mah se thudik a zawt duh chuang lova, a tan hriat loh a him zawk. North Korea-ah chuan thenawm leh thenawm an inenthlak thin avangin Kim Yong chu an chhuar chhungah an thukru a, an thenawmte chuan an inah fel lo engemaw a awm em tih chu an rawn thlithlai ngei a, man chhuah lohvin a awm theih phah a ni.
A tirah chuan Russia lama luh a tum a, a thianpa hi damdawi lama thawk a nih avangin damdawi siamna hmanraw zingah Kim Yong chu thukruin a phur chhuak thei a, Russia leh North Korea te inrina lui thleng a va thlah a. Mahse lui chu a lo zau em avangin hleuh kai a huphurhawm viau mai. Chuvangin an ruahmanna tihdanglam a ngai a, China lama luh chu a remchang zawk dawn a, lui daikai turin thlasik rawn thlen a, lui a khang hun nghah a ngai dawn thung a. Unggi lam an pan leh ta a ni.
Unggi-ah hian a thian hlui pakhat a va bel leh a, North Korea chhuahsan a ngai tih bak chu engmah a sawi ngam chuang lo. A thianpa inah hian zan khat a riah hnuah awmrei a ngamawm loh avangin a chhuak leh ta a. Pan tur lam a hre mai lo. Mahse kawng lakah a thianhlui dang a hmu leh a, an chanchin an inzawh chuan a hriselna tlakhniam zel avangin damdawi ngaihtuaha rawn zin a nih thu a sawi a ngai ta a. A thianpa hian puih ka pui ang che tiin sipai lama an hruaitu pakhat inah a hruailut ta a ni. Sipai hruaitu hnenah hian China thlen a, thil hralh tur tlem a neih tihral leh damdawi ngaihtuah a tum tih a hrilh leh ta a, China-a bungrua lo thawn tawh thin an nih avangin chu sipai hruaitu nupui Pi Li-i chuan China-a hruai thleng thei tur a ngaihtuahsak a, an bungrua pawh kengtel turin a ti ta bawk a ni.
Kum 1999 November thlaah China lam chu an pan ta a, mahse lui a khang that loh avangin lui bul pukah chuan ni 10 chhung vel an awm phawt a. Chumi hnuah chuan China an thleng thei ta a. Amah hruaitu nen chuan inthenin Kim Yong hian China police te a pumpelh a ngai leh ta a, an man a nih vaih chuan thawnkir a, tihhlum tur a ni tih a chiang. A bihruk kualnaah hian South Korea missionary, North Korea atanga tlan chhuakte puitute nen an inchhar fuh a. Thla 6 chhung chu an enkawlnaah awmin anni hian South Korea a thlen theih dan tur an ngaihtuahsak a. A nghah chhung hian bungraw thawntu Pi Li kha China lamah a rawn kai ve bawk a.
Kim Yong hian amah hruaitu hnenah khan thu a hnutchhiah a, amah biak pawh theihna tur a dah tel bawk a. Chu lehkha chu Pi Li-i’n a hmuh hnuah China lam a rawn kai ve tawp a ni awm e. Khatia Kim Yong-a ten China an kai hnuah khan tang tlan chhuak a ni tih chu puanzar a ni a. Li-i pasal, sipai hruaitu khan a hmuh thu a report a, a rawn kir leh tawh lo. Tan tlang chhuak puitua puh a ni tih hriain Li hian a fate leh chhungte chu a kalsan a, a sahimna atan China lam a pan a lo ni a. A fate a kalsan phei chu a inthiam loh khawp mai. Mahse kir leh rual a ni tawh lo.
Missionary te puihna hian South Korea passport lem an nei thei a, chumi nen chuan Beijing lamah an lut a, chuta tang chuan Mongolia lamah a rukin an lut leh ta a. Mahse an vanduai ta thung a. Mongolia-a lut emaw an intih lai hian China ramri-ah bawk an kir leh a. China kuta an awm chu an hlauthawng hle. Mahse hei hi an tana tha zawk tur a lo ni, Mongolia atanga rawn vakvai, South Korea khualzin angin an insawi a, tang an inthleng kualnaah China hian Mongolia thuneitute hnenah an pe ta thung a. Mongolia sipaite man nise chu China kutah an hlan zawk dawn tihna a ni. Mongolia-ah hian South Korea embassy lamin an chanchin an hriat hnuah an tuam hlawm ta a.
Chutih mek lai chuan North Korea palai, an ram phatsantu an awm avangin Kim Yong leh Pi Li te chu endik te an ngai a. South Korea embassy lamin Pi Li chauh hi an endiktir a, man chhuah an ni ta lova. Kim Yong-a endik tel nise chu tang tlan chhuak a ni tih hi an hre chiang viauin a rinawm. Mongolia atang hian South Korea lamah an lut thla a, khua leh tui nihna pek a nih hnuah Kim Yong hi America-ah a pem thla thei ta zel bawk.
North Korea chu a la theihnghilh ngai lo, a nupui fanaute awmna a nih vang a ni. A hnua a hriat leh danin a nupui fanaute pawh an man ngei a, mahse khawiah nge an dah tih chu hriat theih a ni lova, thiin nge damin an awm tih pawh a chiang lova, beiseina nen an inhmuhkhawm hun tur chu ram zalen atanga thlir bak chu tih theih a nei meuh lo. North Korea-in mihring dikna chanvo an rahbeh nasat dan puangzartu niin UN-ah te pawh thu a sawi nghe nghe a. North Korea tan chuan mi hnawksak a ni a, hei vang hian a chhungte leh a thiante humna atan a hming tak chu a thup thlat a, South Korea khua leh tui a nih hnua a hming thar chu a chhawm zui ta bawk a ni.