Environment, Forests & Climate Change Department hnuaia kalpui mek Nature Learning Centre (NLC), Champhai hmalaknaa ni thum awh ‘programme for Cleanliness Drive and River Conservation’ chu vawiin khan zawh fel a ni a, Nature Learning Centre, Champhaia thawktu te, Govt Bethel Middle School leh Bethel Mission School zirlai leh zirtirtute bakah Forest Dept-a thawktute chuan Champhai khawpui tui lakna tuipui hnar an tifai a, hnatlang hian mi 250 thawk chhuakin Bawlhhlawl chi hrang hrang zu um ruak, plastic leh sarang, diaper, tui um ruak, Vawk thi, Ui leh Ar thi bakah oil chhia-te an thianfai a, tuipui lui dunga kai hrang hrangah bawlhhlawh bawm leh mipuite zirtirna poster an tar nghal bawk a ni.
Lui dung thianfaia thawk chhuakte chuan Champhai tui tlan ber Tuipui lui dunga bawlhhlawh chi tin reng paih a ni thin chu pawi an tih thu sawiin Champhai mipuiin tui thianghlim leh hrisel an neih theihna turin lui dungah bawlhhlawh paih tawh lo turin mipuite an ngen ni.
Nature Learning Centre hi Champhai Forest Div-in National Mission on Himalayan Studies project a kalpui mek hnuaia mi niin environment humhalh kawngah programme hrang hrang an kalpui thin a ni.