ZPM Leader, Lalduhoma Chief Minister chuan Ni 100 chhunga thawh tura an duan tam tak an ti hlawhtling tawh niin a sawi.
Vawiin thawhtanni chawhma dar 11:00 khan ZPM chuan Party Office-ah kum 2024 atan Party Office hawnna leh chhung inkhawm hun an hmang a, Lalduhoma, Chief Minister chuan Ni 100 chhunga thawh tura an duan tam tak an ti hlawhtling tawh a, a dang pawh tihlawhtling turin theih tawpin hma an la mek zel tih a sawi a, Officer pension tawh, sawrkar atanga hamthatna la an la awm tih an hria a, chung mite chu rei lote chhunga inchingfel turin warning an pe a, hei hi kan warning tawpna a ni tawh ang tih a sawi a, Mipuite chhiah tling khawm, a hman lohna tura hmang an awm chuan corruption a ni a, endiktu leh enthlatu kan ruat tawh a, engkim chiang takin kan hre zel tawh dawn tih a sawi bawk. Lalduhoma chuan Assembly bial 13-ah an duhthlanna leh zalenna hmang thei lo an la awm chu pawi an tih thu sawiin a dang bial 27-te ruala ke an pen ve theihna turin an dawm kang ve zel dawn a, an thlauhthla dawn chuang lo niina sawi a,Opposition party te chu chona thianghlima cho an duh tih sawiin kum 5 a ral leh hunah ZPM let thla tur khawpin inbuatsaih rawh se, Tun atang chuan eng party mahin an kalphung hlui ang kha chuan min hneh tawh lo ang,” a ti.
Lalduhoma, Chief Minister chuan Delhi, India leh ramdang hausakna chhawr tangkai turin Pathianin kawng a ruahmansak ang tih an ring tih sawiin a ram leh a felna erawh aan zawng hmasa ang tih a sawi a, Chief Minister chuan, “Myanmar atanga raltlan lokalte chhinchhiahna Biometric Identification hi sawrkar hmasa hmalakna kal zel, an chhunzawm mai tur a nih thu a sawi a, fimkhur zawka kal an tum a, thlamuang taka awmhona tur ruahmanna Union Home Minister atangin Assurance an dawng a, ram dang mi Mizorama ILP hmanga lo lutte an vei em em tih sawiin Mizoramah heng mite chhinchhiahna tur felfai leh changkang zawk siam thei an awm a, hmalak tum a nih thu a sawi bawk.
Lalduhoma chuan Pu Nitin Gadkari Union Minister, Road Transport hnenah kum khat hun pe tur leh kum khat chhunga an thawh theih fiah tura a dil thu sawiin hna chak taka an thawh theihna turin Aizawl Eastern by -pass Road, sawrkar hmasain a lo buaipui tawh hmalak nghal a nihna turin sanction an nei tawh ni-a sawiin hna kal lai, loh theih loh a chhunzawm ngai a awm a, cancel ngai erawh engemawzat awmin heng sum chuang bang hi ba rulh nan an hmang dawn niin a sawi bawk.
Thlalehah Prime Minister hmu turin zin leh a tum thu sawiin a zing thei ang bera inhmu turin an inthlah niin a sawi a, thalaite tan kawng a inhawng dawn a, eng pawl nge tih leh eng party nge tih lam an sawi dawn lo a, He ram siamtha tur hian an leng vek a, hna an thawk tlang dawn niin a sawi bawk.