MZP chuan Border Fencing leh Free Movement Regime (FMR) tihtawp tumna duh loh lantirnan vawiin khan Prime Minister Narendra Modi leh Union Home Minister Amit Shah lim an hal.
MZP President Pu H Lalthianghlima chuan MZP-in hemi chungchang hi Mizoram Chief Minister Pu Lalduhoma leh Home Minister Pu Sapdanga chu theih tawpa hmala turin an lo ngen tawh tih sawiin India Prime Minister Pu Narendra Modi hnenah Memorandum thehluh tawh niin, Union Home Minister Pu Amit Shah bakah, India Vice President leh Union Home Secretary-te a copy pek an ni bawk a, Ceneral sawrkar atangin thulh tumna emaw engmah thu lawmawm dawn a ni lova, ramri hung tur hian ngawrh takin inbuatsaihna a kal mek ni-a an hriat avangin MZP chuan Border Fencing leh Free Movement Regime (FMR) tihtawp tumna duh loh lantir nan India Prime Minister Pu Narendra Modi leh Union Home Minister Pu Amit Shah te lim hi an hal ta niin a sawi a; MZP chuan, danin a phal loh ruihhlo leh khap thilte chu ramri hung kher lo hian a tihrem dan dang ngaihtuah zawk turin central sawrkar an ngen tih a sawi bawk.
MZP President chuan India sawrkar-in Chin State leh Mizoram State zalen taka kan inkalpawhna Free Movement Regime (FMR) tih tawp leh ramri hung (Border fencing) an tum chu pawi an ti hle tih sawiin dodal zel an tum thu sawiin Zofate duh reng vang ni lo a, India, Myanmar leh Bangladesh-a thendarh a nih a, ramri chu an rilru tak tak an pawm ngai loh thu a sawi a, Zofate zalen taka kan inkalpawhna ramri hung leh F.M.R tihtawp hian unau, ramriin a thendarh mek Zofate, min thendarh dawn avangin keini tan pawm theih a ni lo a ni.” a ti bawk.