June 9,2024:
Mizoramin Myanmar atanga sumdawnna bungraw chi hrang hrang leh ei leh in tur a lakluhna kawngpui ber, Teddim to Zokhawthar a Lei pawimawh tak, Run Lei chu bomb chhiat anih avangin nimin piah atang khan Myanmar atangin Mizoram lam ah bungrua a rawn lut mumal thei lova, Tahan atanga Teddim kal tlanga Myanmar bungrua, Mizorama lo lut thin chu a tawp rih vek a ni.
Thu dawnnain a sawi danin nimin piah, June ni 8, 2024 inrinni zing karah khan Run lui kal kaina Lei, feet 20 vela zau leh Feet 300 vela thui, (Suspension bridge) chu Myanmar Sipai, State Administration Council mi leh sa nia hriatten Bomb hmangin an tichhia a, he lui hi lirthei leh kea kalte tan pawh kal kai theih a ni rih lo. Hetihlai hian Tahan leh Falam inkara, Run Lei, Var lei an tih chu lirthei leh kea kalten tluang takin an la zawh thei a, a kawng thui zawk pawh nise, Falam atangin Mizoram a Zokhawthar lamah Myanmar bungrua hi rawn lut leh thei tura beisei a ni.