Mizoram Lokayukta chuan Mizoram Rural bank, Champhai Branch-ah sum hmanga inbumna a awm niin complaint an dawng a, Central Bereau of Investigation (CBI) chhui turin thuthlukna an siam a ni. Champhai MRB Branch chungchangah hian Lokayukta chuan Kumin February ni 5, khan complaint an dawng a, an zir chian hnuah CBI-in preliminary enquiry ti se tiin an rel a, CBI hnenah hian February ni 15, khan preliminary enquiry ti tura tihna an thawn tawh a ni. CBI-in Preliminary enquiry report an thehluh hunah Lokayukta hian thubuai kalpui zel dan turah thutlukna an siam dawn a ni. Lokayukta-in complaint an dawn danin Mizoram Rural Bank Champhai Branch-ah hian sum hmanga inbumna a awm a, he inbumnaa sum che vel hi Cheng Nuai 2161 a ni.
He thubuai hi kum 2022-a irh chhuak niin he inbumnaa inhnamhnawihte hian Champhai leh a chhehvel bakah Hnahlan tlang dung lama chhungkaw eng emaw zata mite chu bumin Self help Group dina sorkar laipuiin loan tha mi (KCC Loan) bank kaltlangin a pe chhuak dawn a, Cheng 1,60,000 an chang ang a, kut hah manah za zela 20 cheng 40,000 an hlawh ve ang tiin an thlem a, heng an pawisa pukte hi an hmuh hmain Mizoram Rural Bank atangin loan ba thinna an dawn avangin he mi chungchangah hian Champhai Police station-ah FIR thehluh a lo ni tawh a ni.
He inbumna thila inhnamhnawiah puh mi 4-te PS Zatuanga, Tuangzapauva, Paulamthang, leh Jacob Thanglianchina-te chu Champhai Police-te’n an lo man tawh a, hetih hun laia Mizoram Rural Bank Champhai Branch Manager leh Officer pakhat chu an hna atanga chawlh lailawk tir a lo ni tawh bawk a; he inbumnaah hian chhungkaw 1250 vel hmingin loan hi puk ni-a hriat a ni.