MPSC hna lak dana thil fel hlel awm ni a puh chhui chiang tura ruat IAS chawl tawh M Lalmanzuala chuan vawiin emaw naktukah emaw hian a report a peih hman a rin thu a sawi.
M Lalmanzuala chuan an hna hi sorkar pisa kal ni, ni 2 chiah an la khawih hman niin a sawi a. A thil chhui-na-ah hian sorkar chuan amah pui turin deputy secretary pahnih an pek thu leh MINECO a Secretariat-ah pisa tur an ruahmansak thu a sawi a. MPSC a thawkte chawlhtir rih an nih lai-in an document duh angte pe thei turin thawktu thenkhat chu pisa an kai phalsak a ni, a ti. Report hi thehluh theih thuai a inbeisei thuM Lalmanzuala a sawi a ni.
MPSC-in Combined Civil Service leh sorkar hna dang a lak danah thil fel lo a awm ni a puhin MZP chuan MPSC chairman JC Ramthanga chu bang turin an phut a. A ban loh avangin kar kal ta Thawhtanni atang khan MPSC hnathawkte pisa kal tur an dang a ni.
M Lalmanzuala chuan Nilaini leh Ningani chauh kha sorkar pisa kai ni-a hna an thawh hun a nih thu a sawi a. Inthlan vote thlak ni, Zirtawpni bakah Inrinni leh Pathianni a tlak leh avangin sorkarin ni 7 chhunga a report thehlut tura a tihna-ah sorkar pisa kai ni, ni 7 a tih kher avangin hun an la neih tam thu a sawi a. Chuti chung chuan tunah hian a report hi a hmawr a bawk thei hnai niin a sawi a ni.
April ni 16 khan Mizoram sorkara Vigilance Secretary chuan MPSC hna lakna a thil fel lo awm ni a sawi hi chhui chiang turin Chief Secretary hlui, MPSC-a member leh Chairman hna pawh lo thawk tawh M Lalmanzuala chu a ruat a. Ni 7 chhunga an thil hmuh dan report thehlut turin tih a ni. M Lalmanzuala Lalmanzuala hi MPSC member-ah kum 4 a awm tawh a, kum 6 chhung chairman hna a chelh bawk a ni.