“Ka kum te a lo tam ve ta a, kan ram tana hna tha thawk turin Pathianin hruaitu min pe leh dawn’ – MPCC President, Lalsawta
Mizoram Pradesh Congress Committee chuan vawiin January ni 24.2024 (Thawhlehni) khan Sibys Farm, Mualpui ah Kumthara party intuaithar leh in fuih tharna hun an hmang.
Lalsawta, President MPCC chuan thusawiin, ‘Mizoram enkawltu tur thlannaah sorkar tha siam turin rim takin kan thawk a, mahse Mizoram mipuiin enchhin an duh a, an enchhin phawt loh chuan an dam dawn loh avangin ZPM chu enchhin turin an thlang a, sorkar tha siam turin ram mipuiin an beisei a, keini pawhin kan beisei,” a ti.
Pu Lalsawta chuan, an beisei ang hlawhtlinna an hmu zo ta lo, hei hi Party President a nihna angin inthlana an chak lohna chu a mawh a nih thu sawiin ‘Ka kum te a lo tam ve ta a, kan ram tana hna tha thawk turin Pathianin hruaitu min pe leh dawn’ a ti. Congress Party hruaitu chuan Pathian lam hawia fing leh remhre taka Party hruai a tul a, an duh leh an tum ber chu nihna leh chanvo ni lovin ram, hnam, sakhua humhim leh a n party thatna ni zel rawh se, a ti bawk.
Lal Thanzara, Senior Vice President, MPCC pawhin thu sawiin “Pathianin engkim tan hun a ruat a, roreltute pawh Pathian ruat an ni tih sawiin, ram enkawl turin Pathianin mipui te kaltlangin roreltu min pe a, party leh pawl hruai turin hruaitu min pe a, min ruat sak thin a, mahni chauh in ngaihtuah lovin, tunah leh nakin thlenga Party Congress Party hnathawk leh theia kaihthawh chiah hi ka ngaihtuah tur a ni” a ti.
MPCC Vice President Lalnunmawia Chuaungo chuan, “Tanrualnain thil tha tam tak tak a thlen tir thin a, ram chhungah danglamna a thlen thin, tih sawiin, ram tana Congress party in hna tam tak Pathian leh mipuite zarah a lo thawk tawh a, chutiang hna tha nasa zawka thawk leh turin mahni pawh danglam ngamin, kan zavaia taimakna, ranrualna leh inpekna nen ram siam tha turin kan tho leh ang, a ti bawk.
Dr. Lalmalsawma Nghaka, Treasurer MPCC pawhin thusawiin, “Congress Party-in malsawmna a dawn thin chhan chu mi harsa leh hniam zawk te lamtang a nihna hi a ni, tih sawiin, midangte hmangaihna nen thawk ila, LALPA nghâktute erawh chuan an chakna an siam ṭha leh ang a; mupuite angin thlain an thlâwk chho vang a, hah lovin an tlân ang a, chau lovin kein an kal ang.” a ti bawk.