C Lalrosanga MP (LS) chuan MP inthlan lo awm turah, mifel, tha leh thiam zawkte kianin, an hotute hnenah chawlh a dil tih a sawi.
March ni 11, 2024 (Thawhtanni) khan Mizo Hnam Run chhung inkhawm neih a ni a. Hun hnihnaah C. Lalrosanga, MP (LS) chuan thusawiin, “MP inthlan hmachhawn turah rilru fim tak pu a, ngaihtuahna thar hman a tul hle tih a sawi a, Central politics thlirin, BJP/NDA thawm a lian hle a. Hma an sawn zel a. Anmahni phei chuan seat 400 dawn an lak theih an in beisei hial tih sawiin Inthlan puan anih hma hian ‘Citizenship Amendment Act’ hi rules an peihfel thawkhat tawh avangin, implement ngei an tum niin alang a. Zoram mipuite an rilru siamfel lawk turin a ngen bawk.
C.Lalrosanga chuan Parliament House-ah , BJP/NDA te chuan an duh ang Bill siamin, an passed pawp pawp mai thin ni-a sawiin Manipur chungchangah thusawina hun an pe ve duhlo a, an zawhna pawh an chhang ngailo a, NDA meeting ah pawh thusawina hun an pe duhlo niin a sawi a; All party meeting-a an thusawi ve pawh engah mah an ngai lo niin a sawi bawk.
Lok Sabha MP-ah an hun chhungin state sorkar thil bakah, state leh mimal harsatna tamtak an buaipui ve thin a. Inbiak pawhna leh inkal pawhna te chu a ngai pawimawh hle tih sawiin Ramria inbiak pawhna thalo chungchangah pawh hmalak mek a ni. Party, ram leh hnam leh mipuite tana theihtawp an lo chhuah ve naah hun harsa leh khirh tak tak an paltlang fo a. MP inthlan lo awm turah, mifel, tha leh thiam zawk te kianin, an hotute hnenah chawlh a dil tih a sawi bawk.