Țau Thla 9,2024:
Congress MP Candidate Pu Lalbiakzama chuan MP inthlan lo awm tur chu tualchhunga Political party-te inbeihna ni lovin hnam leh sakhua humhim tura inbeihna a nih thu a sawi.
Lok Sabha inthlan atana campaign neih mekah tukin khan Congress candidate Lalbiakzama chuan street campaign leh press coference Champhaiah a nei a, BJP sorkar hnuaiah sakhaw tlem zawkte leh hnam tlem zawkte an him lo tih sawiin MP inthlan lo awm tur chu tualchhunga political party te inbeihna ni lovin hnam leh sakhaw humhim tura inbeihna zawk a nih thu a sawi a, Candidate thenkhatin ‘NDA lama thu chungin kan bei ang’ ti mah se, an thuin ngaihsak a hlawh lo a, hei hian BJP-in enga tan mah an ngai lo tih a chiang hle tih sawiin hnam leh sakhua humhim turin BJP kaihhruai NDA chawpa paihthlak a ngai a, a thlaktu tur chu anmahni an nih thu a sawi a; Nikum chhungin India ram chhungah Kristiante tihduhna tum 687 a thleng hial chung pawha Mizo Kristiante zinga BJP leh BJP lam tang an la awm thei chu mak a tih thu a sawi bawk.
Lalbiakzama chuan thu thar thehdarhtute zawhna chhangin thlan tlin a nih chuan Mizoram Sorkar nena thawhhona kawngah sorkarin a thurualpui duh lo a nih loh chuan ram tana thawkho tura a inhawn thu a sawi a, Manipur-ah Myanmar ramri hawn a nih laia Mizorama khar a ni bik chu thlan tlin a nih chuan bawhzui a tum thu sawiin Zokhawrhar kaltlanga insumdawn tawnna chu Mizoram economic khawih danglam pha hial a nih vangin tun hma anga tluak taka a kal theihna turin hna hmasa berah a nei dawn niin a sawi bawk.
Lalbiakzama chuan hmasawnna hnathawh leh sum avangin zahawmna, ram leh sakhua tih bawrhban rem an ti dawn lo tih sawiin hnam leh sakhaw issue-ah khawvel pum huap pawhin Mizote an him tawh lo tih a sawi a, MP-a thlan tlin a nih chuan theitawpin hma a la dawn tih a sawi bawk.
MPCC President Lal Thanzara pawhin Mizo hnam leh sakhua dinhmun thlirin NDA lama thute leh an thutna tur la tichiang lote thlan tlin a him tawh lo tih sawiin sorkarna an siam a nih chuan khawchhak lama sumdawnna tipuitling tura hma an lak tur thu a sawi bawk.