Mizoram Lok Sabha bial khat inthlanna chuh tura hming pe mi 6 zingah Congress party candidate Pu Lalbiakzama chu a hausa ber.
Mizoram Lok Sabha bial inthlan chuh tur zingah Mizoram Police Service (MPS) hlui, Home Secretary a nih laia a hna atanga chawl ta Congress candidate Pu Lalbiakzama hian nomination a thehluh ruala affidavit a theh luh telah chuan a sum fai neih, khawih chet theih thil Cheng vaibelchhe 1 a hlu a neih laiin khawih chet theih loh thil Cheng vaibelchhe 2 leh Nuai 80 a nei a. Khawih chet theih loh ro a neih hi lo neih nana siam chi ram pakhat leh lo neihna atana siam chi ni lo ram 2 a ni. A nupuiin khawih chet theih thil Cheng 4,790 hu a nei a, a chhungkaw midangte’n khawih chet theih thil an neih belhkhawm chu a hlut zawng Cheng Nuai 7 Sing 4 leh Sang 1 a ni. Candidate 6 zinga 4 te hi an thil neih zawng zawng belhkhawm Cheng vaibelchhe khat chuang an ni hlawm a. A rethei ber chu BJP candidate Pu Vanlalhmuaka a ni a, thil khawih chet theih Cheng Nuai 11 leh Sing 3 a nei a ni.
Hausa ber dawttu chu independent candidate Lalhriatrenga Chhangte a ni a. A nupui ram neih hlut zawng nena chhut chuan a thil neih zawng zawng hlut zawng hi Cheng vaibelchhe 2 leh Nuai 7 chuang a ni.
A pathumna chu Rajya Sabha MP ni lai MNF candidate Pu K. Vanlalvena a ni a. Lak sawn theih thil Cheng Nuai 58 Sing 3 leh Sang 6 hu a neih laiin lak sawn theih loh ro, Cheng vaibelchhe 1 leh Nuai 24 hu a nei a ni.
ZPM candidate Richard Vanlalhmangaiha chu palina niin lak sawn theih thil Cheng Nuai 97 Sing 7 leh Sang 4 a neih bakah lak sawn theih loh ro, Cheng Nuai 70 a nei a, a belhkhawm chu Cheng vaibelchhe 1 leh Nuai 67 a ni.
Hmeichhe candidate awm chhun Pi Rita Malsawma (MPC) chuan laksawn theih chi Cheng Nuai 16 leh Sing 6 hu thil a nei a ni.