Vawiin Assembly thutkhawm ni thumnaah House Leader, Lalduhoma Chief Minister chuan thu sawiin Larsap thusawi house-a sawihonaa an lungrual ber tum a nih thu a sawi a.
Lalduhoma chuan MLA-in designation plate tar loh tih inthlan hmasaka an manifesto-a an tarlan chu tun tumah erawh chuan an tel tawh lo niin a sawi a; inthlahrung lovin a tute pawhin designation plate an hmang thei niin a sawi.
Larsap-in a sawi tel loh ni-a house-a sawi lan hrang hrang House leader Lalduhoma chuan sawifiahin Loan puk chungchangah Quarantor-ah sorkar atang dawn tih sawiin MSME hnuaiah a theihsa reng tih sawiin convergence-in Central sorkar scheme nen kalpui an tum thu a sawi bawk. Boundary committee din an tum thu sawiin ramri kan chingfel ang kan ti lo a, ramri-a buaina a awm veleha committee din chungchung loin a tir atanga committee neihsa kan duh a ni a ti.
Lalduhoma chuan Resource Mobilisation Dept chu Dept dinna thama an ngaih loh avangin niminah a tihtawpna order a approve fel tih sawiin a committee zawngin an kalpui dawn a, chairman-ah IAS rtd Chief Secretary hlui thla tin cheng 1 hlawhin an hmang dawn tih a sawi a, Sorkar liamta-in a tih mek engmah danglamna awm lo a, an chhawm mek a awm thu sawiin raltlante enkawl chu Home Minister, External Affairs Minster nena sawi dun an tum mek a nih thu sawi a, an chhunzawm zel dawn niin a sawi bawk.
Chief Minister chuan SEDP zirtirtute chungchang Cabinet-in an sawiho tawh thu sawiin tun financial year thlengin an chhawr chhunzawm tih a sawi a, a hnu lam erawh chu Education Minister-in tul a tih angin a kalpui turah an ngai tih a sawi a, MSSSB chu exam an buatsaih mek an zawh hunah an thiat dawn tih sawiin party induhsak theihna a din reng chuan sorkar apiangin remchangah an hman theih dawn avangin MPSC an thuam chak zawk dawn niin a sawi bawk.