Santosh Trophy Final Round Arunachal Pradesh-a khelh mekah Vawiin khan Mizoram chuan 5-1 in Delhi an hneh.
Delhi lam hian bul tan tha zawkin inkhel thunun zawk mah se, Mizoram hian inkhelh tan atanga min 26-naah Lalthankima ball pek tha zet chu MC Malsawmzuala’n goall-ah pet lutin Mizoramin hma an hruai ngal a, Min 29-naah Malsawmzuala Tlangte-in Mizoram goal 2-na a tauh goal.
Min 32-naah Malsawmzuala Tlangte bawkin a tlan chak zar zoin Mizoram goal 3-na a khung. Min 38-naah Mizoram winger tlanchak leh tangkai Lalthankima’n dinglam sirah ball chak taka tlan luhpuiin MC Malsawmzuala tan a pe a, MC-a hian mawi takin goal-ah a volley lut a, Ist half ah goal dang a luh belh lo.
2nd Half Min 66-naah Malsawmtluanga ball pek tha zet chu Dawngtea’n mawi taka keeper pet khumin Mizoram goal 5-na a khung a, Min 92-naah Mizoram captain Lalrinchhana chesualin keeper a back pass sual chu Delhi captain Mohit Mittal-in Delhi goal awm chhun a khung a; hun a tawp zui a, Mizoram hian 5-1 in hnehna an chang a, Match 3 an khelh tawhah hnehna an chan hmasak berna a ni.
Mizoram hian an match hmasa berah Mahrastra an hneh lo a, an vawhnih khelhnaa Karnataka hmachhawnin si 2 an khung hmasak hnuah 2-2 in an inhneh tawkpui leh a, vawi 3 khelhah point 4 an nei mek a ni.
Mizoram hian February ni 29, chawhma dar 10:00 Manipur an hmachhawn dawn a, Railways an la hmachhawn leh dawn bawk a ni.