Vawiin khan Home Minister K. Sapdanga leh Excise Minister Lalnghinglova Hmar te chuan Khawzawl an tlawh a; He hunah hian thu sawiin K. Sapdanga chuan Home Minister a nih hnua official-a Batallion hmunpui a tlawh hmasak ber – 2nd IR, Khawzawl a tlawh thei chu lawmawm a tih thu a sawi a. Mizoram sawrkar thar chuan khawtlang muanna leh mipuite thlamuanna a ngaipawimawh a ni, a ti.
Home Minister chuan tlawmngai pawl te nena thawkhovin ram ralmuang, dan leh thupek tha taka kenkawhna siam theih sawrkarin a beisei thu a sawi a; sawrkar hnathawk, tlawmngai pawl hruaitute he mi kawngah hian thawhpui a sawm nghal a ni.
Home Minister hian Krismas leh Kumthara Police Duty te tanpui nan 2nd IR Battalion leh Khawzawl SP Office te hnenah cheng ₹10,000 ve ve a hlan nghal bawk.
Excise Minister Lalnghinglova Hmar pawhin thu sawiin ruihhlo dona kawngah Mizoram mipuite tanrual a ngaih tak zet thu a sawi a. Mizoram sawrkarin ruihhlo do a ngaihpawimawh thu sawiin, 9th Mizoram Legislative Assembly thutkhawm hmasak berah Larsap leh Chief Minister te pawhin an sawi chhuah thu a tarlang. Mizoramin kawng tam takah hmasawnna hmu mah se, a chhawrtu tur thalaite ruihhlo vanga hnathawk thei lova an awm chuan hmasawnna chuan awmzia a nei dawn lo a ni, a ti a. Ruihhlo dona kawngah sawrkar, tlawmngai pawl leh kohhran hruaitute chak leh zuala an thawhho a ngai a ni tiin Mizoram mipuite chu ruihhlo do kawngah thawhho puiah a sawm.
Inkhawm hi Khawzawl Bawrhsap K. Lalrohlua’n a kaihruai a, 2nd IR Battalion Commandant Saidingliana Sailo in inlawmna thu a sawi. Home Minister leh Excise Minister te hi Thomas Zodingliana, DIG (Eastern Range), David H. Lalthangliana OSD (Home) leh Z. Lalhmangaiha, Jt. Commissioner (Excise) ten an tawiawm a ni.