Myanmar atanga Mizorama raltlana lut mi engemaw zat chu an kir leh a. Farkawn ralah inkahna avanginmi 68 chu an rawn luh belh tum an awm thung.
Raltlan rawn luh tumte hi Tuipuiral Group YMA chuan an inkulhna tur Silpauline an ngaihtuahsak a, he thu buatsaih thleng hian Indo-Myanmar ramri, Tuibual leh Tiau inkarah an la awm. Inkahna hi nimin khan Chin State, Mizoram hnaih lam Hmunthar – Mualkai a chhuak niin CNF atanga kan thudawnna chuan a sawi a. Chin National Front (CNF) leh Chinland Defence Force (CDF) te tangkawp chuan sipai an kap a. Sipaite hian June ni 9 khan CNF te hmunpui hi an lo pan tawh.
Sub-Hqrs YMA Champhai venhimna hnuaian mi 400 chuangte chuan ramri kanin Myanmar-ah an let leh tawh a. SYMA Champhai President F.Lalrinmuana chuan, “Myanmar atanga sahimna zawnga Mizorama rawn tlanchhia, kir leh duhte hian him taka ramri an kan chu YMA in a duh avangin ramri thlengin kan thlah thin.” a ti. SYMA Champhai hriatpui loh hian ral tlan engngemaw zat an let leh tawh tih hriat a ni bawk a, mi 500 chuang chu an let leh tawh rin a ni.
Sorkar chhinchhiah danin Mizoram pumah raltlan hi mi 16000 vel an awm a, Champhai District bikah mi 3700 vel an awm bawk.
Raltlan kir leh tam zawk chu sum leh pai an tlakchham vang a ni. Raltlan lo dawngsawngtute zinga mi pakhatin Maipawl a hrilh danin, “An sum leh pai neih ang ang nen an rawn chhuk a. Mahse inkharkhipna avanga engmah thawh theih a nih loh hnuah harsatna an tawk a. Sum leh paiah hian mi tlawmngai thenkhatte chuan tanpuina an pe thin. Mahse hri len hnuah khan tanpuina rawn lut a awm tak loh avangin an mangang a, an kir leh ta a ni.” a ti.
Kir leh tura an ram ralmuan leh ralmuan loh chungchang zawhna chhangin, “Khaw thenkhatah chuan tharum thawhna a chhuak tawh lova. Tuna kir lehte hi chung khuaa mite chu an ni tlangpui. Chin State-a sipai leh Chinland Defence Force (CDF) te inkahna khuaa mite chu an la kir leh ngam lo.” tiin a sawi.
Myanmar-a kir leh zingah hian raltlan ni lem lo, Myanmar atanga Mizorama rawn awm. Inkharkhip rei avanga hnathawh tur awm lo pawh mi thenkhat chu an awm ve tih Maipawl-in kir leh tumte a kawmna atangin hriat a ni.
Hetihlai hian raltlante kir lehna zinga mi Kalaymyo chu Covid-19 avangin an buai hle. Nimin khan Kalaymyo-ah hian hri avangin mi 8 an thi a, thi dang mi pathum chu finfiah ni lo mah se rinhlelh an ni a. Damdawi inah mi 220 vel awmin Quarantine Center-ah mi 150 vel an awm bawk.
Maipawl-in Kalaymyo-a volunteer a biakpawhte sawidanin, “Tuna hrileng rawn darh thar leh hi khawi atangin nge tih chu hriat a ni lova. Mahse raltlan rawn kir lehte rawn hawn a nih a rinawm ber.” tiin a sawi a. Thawktute an indaih loh avangin harsatna a tawk nasa zual bawk.
“Damlo tam tak hi thawkna lama harsatna nei an ni a. Oxygen siam chhuahna chu Tahan chhehveleh hmun thum awm mah se kan mamawh zat kan siam chhuak thei meuh lo. Ventilator leh oxygen bur pawh Yangon leh Mandalay-ah te ram buai kaihhnawiha kawng tihchhiat avangin a chah theih loh a. Hei hi a inenkawlna lama kan buaina ber pakhat a ni.” tiin volunteer chuan a sawi.