Adam Reiner hi khawvela mite leh milian ni khawp thei awmchhun a la ni. Kum 1899 March ni 4 khan Austria rama khawpui lian ber dawttu Graz khawpuiah a piang a, a pa hi feet 5 leh inches 8 a sang niin a nu chu feet 5 leh inches 5 a ni ve thung a. A unaupa, a pa fa hmasa pawh feet 5.8 vela sang a ni a, an ramah chuan san lamah mi pangngai tak an ni. Mahse Rainer erawh chu a te hle thung, mi tetna dwarfism engemaw a pianpui ni tura ngaih a ni a, feet 3.10 bakin a thang thei lo. Kum 21 a tlin thlengin san lamah hian hma a sawn tak tak thei lova, a cherin a chak lo hle bawk a. An venga mite chuan mite kha tih te pawhin an hre hman nghe nghe.
Europe-ah indopui pakhatna a rawn chhuak a, thalaite chuan ram tana nun hlan ka huam tiin sipaiah an inziak lut a, mi maktaduai 70 vel chu sipaiah an tang a, chung zinga maktaduai 60 vel chu Europe mi an ni. Adam pawh Central Powers lam, Germany, Austria-Hungary leh Ottoman lalram leh Bulgaria sipaia tang a, Britian, US leh an thurualpuite do turin rammut vek a tum a. Sipaiah a intlar ve a ni. Mahse a tet mai bakah a chak loh em avangin sipai ni tlak lo turah an ruat a, tum hnih ngawt mai an hnawl a. Chu chu kum 1917 leh 1918-ah sipaiah khan niin kum 18 leh 19 mi a nih lai a ni. Sipaia a intlar ve tuma a san zawng hi chhinchhiah thlap a. Kum 18 a nih hian feet 4 chuang awrh a ni a, kum 19 a nihin feet 3.7 velin an teh leh a. Mihring than kin tawh tura ngaih, feet 4.10 tling lo chu mite anga ngaih niin Adam pawh hi doctor te chuan mi te angin an chhinchhiah a. Sipaia a intlar tum hian te viau mah se a kut leh ke erawh chu a taksa phu lovin a lian thung a, mahse sipai hmantlak tak a nih phahna tur a awm chuang lo tiin an hnawl a ni.
Kum 21 a tlin thlengin feet 5 a pel miah lova, mahse a than erawh chu a thang zui ta zel thung a, a thang satliah pawh ni lovin doctor te mite tia an pawm thlap tawh kha milianah a rawn chhuak a ni. Sipaia a intlar hnu kum khat, kum 1919-ah khan inches hnihin a thang a, kum 20-a inches hniha than belh chu thil pangngai tak a ni lo naa mite tan chuan thil lawmawm tak a ni awm e. Mahse chutah chuan a tawp ta tlat lo a ni.
Kum 1920 a rawn inher chhuak a, Adam hi a la thang naa mite erawh chu a la ni chhunzawm ta zel a, a cherin a chak lo zui em em bawk a. Kum 21-ah phei chuan mihring pangngai than chu a kin tawh tura ngaih a ni a. Adam pawh san zawngah chu bak chuan a danglam tawh lo turah an ngai nghe nghe. Hetiang lai hian a mit a thimin a khaw hmuh a fiah lo tan bawk a, a mit a del lo chauh a. A beng lah chuti bawk chu, a beng veilam chu a chhet a, a dinglam chauhvin ri a hre thei a, koh rin a ngai thei viau mai. Mahse inches 2-a a thang kha a than belh ta vak mai thung a, mite an tih thin kha kar lovah mi pangngai tiat a rawn ni ta mai a, a than chu a kin lo mai ni lovin mihring than dan aia uchuakin a thang ta zel. A than duh dan chu a pheikhawk bun atang hian a chiang mai awm e, sipaia a intlar lai khan pheikhawk hi US ho tehnaa number 10 a bun a, kum thum hnuah chuan number 20 a bun der tawh a, basketball player-a palian pawl Shaq O’Neal hian number 23 a bun thin. Thla khat lekah pheikhawk a bun tawk lo zung zung dawn tihna a ni. Chutih rual chuan a hriselna a tlahniam chho zel thung a, a than nasat vang te pawh hi a ni maithei, a zang kul a rawn lang chuak a, kum 1925 atang phei kha chuan a bawrhsawmin a chaw ei a tui ta meuh lova, chaw a thlah lo chauh tawh bakah kal a harsat em em bawk.
Kum 21-a mi te la ni kha kum 10 a vei leh a, kum 10 vel a nih meuh chuan feet hnih chuangin a lo thang leh der tawh a. Kum 32 a nih phei chuan mi pangngai chu sawi loh, miliana chhiar tel tham tur a ni tawh a, feet 7.1 lai a ni tawh a, a hmaa tlan terh terh thin khan tunah chuan basketball khel atan a itawm ta viau awm e. Hetia mite atanga kum 10 emaw chhung leka miliana a chhuak ta daih hi doctor te chuan mak an ti hle. Kum 1930 August ni 25 atanga kum 1931 May ni 23 chhungin Adam Rainer hi Dr A Mandl leh Dr F Windholz te chuan an zirchiang ta a, Adam hian bawk chi khat, acromegaly an tih nasa taka siam theitu tur a neih a nih an ring ta a. Hei hi pituitary gland-a danglamna chi khat niin thanna siamtu hormone chu taksaah nasa takin a pe chhuak a, mihring than dan leh san dan phu lovin an lian ta thin a ni.
Acromegaly nei zingah chuan wrestler hlui Andre the giant pawh kha a tel ve a, ani pawh kha feet 7.4 a ni a, Wrestler tho Big Show tia hriat lar, Paul Wright pawhin he danglamna hi a nei ve bawk. Andre the giant hian acromegaly danglamin a ken tel kut leh ke lian bik te a nei a, Adam Reiner pawh chuti cho chu a ni a. Chumai bakah a hmai chu a dung zawngin a thang a, a khabe leh a chak te chu mi pangngai hmaia mi aiin a lian bik bawk a, a hmui a chhahin a ha pawh a khat tel bawk a. Acromegaly nei zingah chuan a nasa ber pawl ni tura ngaih a ni.
A zang kul kha a taksa pawt kur chi ni lovin a sir zawngin a ni bawk a, a than nasat hnuah hian a nasa zual ta lehnghal a. A dinin a ding kawisawi deuh a, feet 7.1 a ni chung hian a din chuan a zang kul avangin feet 6.1 a ni thung. Doctor te chuan a danglamna hi an tireh vat a nih loh chuan a nunnain a tuar thei dawn niin an ngai a ni. A danglamna pakhat chu milian turte hi chu an naupan lai emaw an tleirawl chhuahah a rawn lang chhuak thin a ni a, kum 21 ah chuan sang tak an ni tawh thin. Adam erawh hi chuan sang turin a nghak rei viau a, mite a nih laia san a chak theihna chu tlaikhaw hnuah tihpuitlinin a awm a, a duh aiin a sang ta mah mah awm e.
Mahse pituitary gland zai a, a bawk paih erawh chu a risk a sangin hlawhtlin theihna remchang a hniam hle a, kum 10 chhung theihpatawpa a lo than tawh dan ngaihtuah phei chuan bawk hi paih a huphurhawm zual a. An paih loh erawh chuan a than nasat avangin a taksa a chhe zual zel ang a, a thi vat dawn tih a chiang thung a. Chuvangin kum 1930 December ni 2-ah khan Rainer chu Professor O.Hirsh-a’n a zai ta a, a bawk chu hlawhtling taka paihsak a ni. An zai zawh atanga rei vak lovah Adam hi an teh leh ngat a, a la thang zel tih hmuh chhuah a ni a. An zaina avang khan a than chu muang deuh mah se a tawp tihna phei chu a ni lo thung a, mahse a nunna chu an zaina hlawhtling avang khan pawhseisak a ni ta. Hetihlai hian a zang kul chu a zual zel a, kal pawh a kal hleithei ta meuh lova, khum betin a awm deuh chawt a ni.
Adam Reiner hi a danglam em avangin engtin nge a nun a hman thin tih bawr vel chu sawilan a ni ngai meuh lova, an zai atanga a thih ni thlenga a awm zel dan pawh chhinchhiahna fumfe tak a awm lo. Mahse a hriselna a that loh tak zel avangin indopui pakhatna laia mite kha indopui pahnihna a zawh hnu, kum 1950-a kum 55 nia a thih meuh chuan milian a ni der tawh a, a thih hian feet 7 leh inches 10 a sang a ni a, an zai hnuah khan inches 9 velin a la thang zui ta tho tihna a ni.
Milian zingah hian feet 8 pel thei an awm nual tawh a, mahse chhinchhiah theiha feet 8 tling hmasa ber chu Anton de Franckenpoint-a a ni kum zabi 16-na laiin German-ah sipai a ni thin a, an lal khawnbawl pakhat venghimtu-ah a tang thin. Anton hi feet 8 chiah chiah a ni a, a ruhro chu Marburg-a Museum Anatomicum-ah vawn that a la ni. A hnuah feet 8 tling thei hi mi 19 vel an awm tawh a. Khawvela mihring sang ber Robert Wadlow phei chuan inches 11 in feet 8 hi a rawn khum a ni.