Rinhlelhna vang chauhvin thiam loh chantir theih a ni lo tiin dam chhunga tang tur mi pahnih, pafa chu an thubuai a tihtawpsak a. A hunlai chuan hei hi Mizoram pawn lam thleng rak khawp vanduaina rapthlak tak mai thleng a ni.
Kum 2015 khan a ni a, Champhai Vengtharah in a kang a. Nunna chante hi naupang pahnih leh pitar kum 65 mite an ni a. Kangmei a mih hnuah buaina a zual zui ta chauh. In kang hi hal niin a lang ta a, police ten an chhuizuina atangin mi pahnih te chu pawikhawihtua puhin man an ni a, dam chhuak kha an mo niin nunna chan naupangte kha an tute an ni a. Police te hnenah a pa zawk hian a tih a nih thu a puang nghe nghe niin khatih hunlaia media report atangin a hriat theih bawk.
He thil thlengah hian khawtlang an thinrimin, pawikhawihtua puhte hi District Jail-a hmuh tumin an kalkhawm hial a nih kha. An thubuai hi kum 5 chhung ngaihtuah a nih hnuah kum 2020 June thla khan thiam loh chantir an ni a, dam chhunga tang tur leh pawisa chawi turin a ti a, he thutlukna hi court sang zawkah khing letin, court chuan thiam a chantir.
In hi zan dar 1:11 velah a kang a, zan tirah an fa piancham an lawm a. In neitu hian a pasal, kum 2015 a pum na avanga boral tawh chhungte, a pa leh a unaupa, pawikhawihtua puh takte pawh hi a sawm a. A pa zawk hi a tel a, a pasal unaupa erawh a tel lo thung a. An muttui lai bawr velin in neitu nu hi a harh hmasa ber a, midang a kaithovin an in chu meikhuin a khat tawh a. Kawngka hawn an tum chu pawn lam atangin a inkalh, niin in neitu hian a sawi a. An thenawmpa mu thei lo chuan ui bauh ri avangin tukverh atangin an pawn lam a va en a. In kang hi hmu a, kawngka a va pawt hawng a, In neitu leh midang 4 te him takin an chhuak thei a. A nu erawh a tute pahnih chhan turin a tlanlut leh a, kangmei a lo nasa tawh bawk nen, vanduaithlak tak maiin an pathum hian an boral ta a ni.
In a kang tih hriat veleh hian YMA chuan information-ah an au a. A thelh tura thawk chhuak zingah hian pawikhawihtua a puh pawh hi a tel ve nghe nghe a. Pawn lama kawngka inkalh nia sawi a lo ni kher nen, in kang satliah a nih loh theihna lai awmin an hria a. Police ten an chhuizui chuan pawikhawihtua puh 2-na hian hemi zan hian petrol a lei a, chumi hmang chuan in a hal a ni ang, tiin, kangmei chhuah chhan hi petrol vang nia sawi awm bawk a. Petrol pawh hi hmuh chhuah a ni ta chiah nghe nghe a.
In hi a mipa lam ta, ti mai ang, ina chengte pa ber, boral ta hminga awm a ni a. A boral takah chuan a pa leh a naute hian an it a, chhuhsak an tum niin a neitu nu hian a ngai a. A fapa thih hnu lawkah pawh hian an ram leh an in chhunga bungraw inchuhnaa lo thleng tawh niin a sawi a. Hei bakah hian a pasal awm loh hlan thlemna te a tawk tawhin a lakah lungawi lohna an nei niin a ngai a. A pasal thih hnu lawkah hian midang hriat turin an in leh a chhunga awmte a chuhna a sawi chhuak a. A pasal nau hian an in chhung bungrua a ru chhuakin a hralhsak a, kut a thlak tel bawk a. police te hnenah compain a thehluh phah a. A hmain in hi halah an lo vau tawh niin a sawi bawk a. An in kan zan hian rinhlelh tur thil emaw a titu ni awm erawh a hmu lo niin a sawi tel bawk.
An chungthu relnaah hian petrol hi a zuartu chuan a pa hnenah hian litre 5 a hralh ngei a, an auto-rickshaw a thun tura tih niin tum dangah chuan litre hnih-khat ten a lei thin a. An petrol lei hi in halna atan an hmang em tih te leh in kan chhan ber a ni em tih a hriat loh thu a sawi a. Thuhretu dang chuan petrol hi thawl hnihin a lei a, thawl khat chu a fanu te inah a dah a, thawl khat chu in halna atan a hmang ta a. Hei hi a pa zawk sawi chhuah atanga hriat niin, petrol thawl khat an va hmuh chhuah chhan theih chhan kha a ni a.
Zanah a pa hi fanute inah a riak a. A petrol thawl pawh a fanuin a dahna a hriatpui niin a sawi a. Zanah kang thelh tur hian a chhuak ngei tih in kanna bawr vela awmte chuan an sawi thei a, hemi hma hian in hi a halin information-a an au hnuah khan kangthelh tur ni awm takin a chhuak leh a ni ang, tih hi an puhdan a ni. A fapa thung kha, zurui chungin a thianpa inah a riak a. In kang an au khan a thianpa chuan in monu te in a kang a nia, a ti a. Ka va kal chuan min ringhlel dawn tiin a kal duh lova.
A tuka an hman hnuah a fapa zawk hian a u thih hnu lawkah a pain a u nupuite dah tha a, an in hmun leh a dang insem turin a fuih a. A pasal hming hian engkim a awm avangin, a thih takah chuan a nupuite chu a rokhawm turte an ni, tiin thu zawhfiahnaah a sawi a. A pa hian an in hmun a chan theih nan a phiar ta niin an thubuai ngaihtuahnaah hian sawi chhuah a ni a. Birthday an lawm zan khan a pa hi an lo chiauau tha lutuk lova, chumi thinrim chuan an in a va hal ta a, a petrol thawl hnih atangin thawl khat a hmang tiin khatiang hunlaia a inpuannaah khan a lo sawi tawh a nih kha.
Heng finfiahna hrang hrangte hi chutiang chu a ni e ti turin kut man emaw, mita hmutu an awm lova, circumstantial evidence-ah a innghat a. Hei hi High Court-in thiam a chantir leh tak chhan pawh niin a lang a, pawikhawihtute hi rinhlelh turin awm mah se an tih a ni ngei tih finfiahna chiang tak hmuh chhuah tur a awm lova.
High Court-ah hian an ukil chuan khami zan khan petrol litre 5 a lei a, a ngai ngaiin hmuh chhuah leh a ni a. Pawikhawihna hmanrua a ni thei lo, tiin, In kha pawm lam atanga kalh ni chungin a hawngtu khan a pawt hawng tih te, mita hmutu awm lo leh a dangte tanfungah a hmang a. Court hniam zawka an chungthu rel lai khan a fanu hian information-a an au hnuah a pa hi a thawh lai a hria a. Chumi hma chuan a tho em tih a hre lo tih a sawi a. A fapa pawh kha a thianpain a hmain a thovin a chhuak em tih a hre bik lo bawk.
An inpuang alawm tihah hian dan chuan inpuanna hi finfiahna atan a hman theih loh a, mahse thuhretute hnial kalhna leh cross nan chuan hman theih a ni ang, tiin court chuan a sawi a. Thiam loh chantir an nihnaah hian a pawi an khawih ngei tih rinhlelh rual lohvin fiah tur a ni a, rinhlelh vangin thiam loh chantir theih a ni lo, tiin an pahnih hian court chuan an thubuai a tihtawpsak a.
Court hian misual 99 hrem lova chhuah aiin pawikhawihna nei lo mi 1 hrem palh a hlau zawk a. An thubuai a tihtawp chhan pawh hi mita hmutu awm lo leh finfiahna tha a awm loh vang a ni.
Hetihlai hian he thil thlenna khawtlang hruaitute chuan court-in an thubuai a tihtawpsak tih an hriat rual hian pawikhawihtua puh pahnihte hi an vengah an cheng chhunzawm tawh lo tih an chian nghal thu leh, cheng tura an duh tawh loh thu an sawi a. A tuartute lama an tan thu leh, kha thil thlengah kha tihpalh leh vanduai vanga thil nia an ngaih theih loh thu an sawi tel bawk a ni.