Aligarh-a zu chhe in, mi 100 chuangin an thihpuia mawhphurtu BJP hruaitu Rishi Sharma chu man a ni.
Rishi Sharma lumanah hian police chuan cheng nuai 1 an chhiar a. Ni 10 chhung a bikbo hnuah Pathianni zing khan Bulandshahar ramri bulah an man. A rual hian he thila inhnamhnawih midang Vipin Yadav, Anil Chaudhary leh an makpa Neeraj Chaudhary te, Rishi Sharma unaupa Munish Sharma leh Shiv Kumar te chu man tel an ni a. A hmain Rishi Sharma nupui leh fapa te an lo man tawh bawk.
Zu chhe in kaihhnawihah hian thubuai 17 tehluh a ni a, mi 61 man tawh niin heng mite thil neih cheng vaibelchhe 5 man hu chu an man tel tawh bawk.
Zu chhia hi Aligarh District, Uttar Pradesh-ah hian Good Evening label hmanga zawrh chhuah a ni a. He zu intute chu May thla kar tawpah khan an damlo tan a, finfiah theih chinah mi 100 chuang an thi tawh a. Thuneitute chuan zu chhia siamtute man leh a inhnamhnawihte umzui hna chu thawk nghalin a bultumtu bera ngaih chu man a ni zui ta a ni.