MHIP Sub Hqrs Champhai rorel inkhawm chuan kumpuan atan Ruihhlo do beihpui thlak an thlang.
MHIP Sub Hqrs Champhai chuan Silver Jubilee an lawmna kal zelah vawiin khan rorel inkhawm an nei a, rorel inkhawm hi Pi Lalhmachhuani President chuan kaihruaiin rorel inkhawm chuan Kumpuan neih nise ti-a relin kumpuan atan Ruihhlo do beihpui thlak an thlang a, hei bakah hian Chhiatnia pangpar leh puan inpek thin aiin suma inpek uar zawka inzirtir leh Kuang chunga pangpar dah chungchanga an dan ding lai ennawn nise an ti a, Sub Hqrs Conference Kuma rorel inkhawm an neih thin chu nei tawh loin Special Meeting-in rorel thin nise an ti bawk a ni.
Vawiin hian Kum 10 hruaitu lo ni tawh mi 32-te chawimawina thu ziak an hlan a, MJA Champhai kaihhruaina hnuaiah hruaitu thar tur an thlang nghal bawk a ni. President-ah Pi Lalhmachhuani Varte, Vice President-ah Pi Lalhlimthangi Khiangte, Gen Secretary-ah Pi C Vanlalruati, Asst. Secretary-ah Pi LH Rengpuii, Treasurer-ah Pi Lalrozami, Fin. Secy-ah Pi K Lalhmingmawiite thlan an ni.
Sub Hqrs MHIP Champhai hnuaiah hian Block 3, Tuipuiral Block, Hnahlan Block leh Hringlangtlang Block-te awm mekin Joint 1, Hnahlan Joint a awm bawk a. Branch 68 neiin member 27,828 an awm mek a ni.