July 30,2024 : Champhai District hmar lam Lungphunlian khaw dai a, Kanghmun kham puk chhungah mihring ruhro thehnam tak hmuh a ni.
Heng ruhro te hi Lungphunlian ram chhung, Lungphunlian atanga hmar lam km 2 vela awm Kanghmun puka hmuh chhuah a ni a, Puk Feet 12 vela thuk Feet 40 vela sei leh a sang lai berah Feet 18 vela sang a ni a; tun hma lamin he lai chhehvelah hian ruh them hmuh tawh thin ni mah se, ramsa ruhro emaw tiin enchian leh ngaihsak zui a hlawh ngai lo a. Nimin July 29 khan Lengteng Wildlife Sanctuary hnuaia Wildlife Guard Duty, Lalropuia, chu he puk chhungah hian lutin mihring khabe ruh a hai chhuah hnuah ngal ruh, ha ruh leh lu ruh thahnem tak a hai chhuak zui a; ruhro bakah hian Hlum bel, belthleng leh thir te pawh a hai chhuak bawk a ni.
Lalropuia hian ruhro a hai chhuah thu hi Pungphunlian VC leh YMA hruaitute a hriattir a, ruhro hai chhuah a nih thu hi ICFAI University-in an lo hriatin zirchian an tum thu Lungphunlian khawtlang hruaitute hi an hrilh a, ruhro-te hi khawih chhet theih loh turin venhim rih a ni.
Lungphunlian khaw kiang, Kanghmun-ah hian tun hmain mihring an cheng tawh thin a, Kum 1912-1915 vel khan a khaw puma a kan avangin Lungphunlian khaw hmunah hian an insawn ta ni-a sawi a ni.