Mizoram Rural Bank hnuaia loan rul tha duh lo mi 5 te chenna in chu Champhai bawrhsap thupek angin tun hnai khan kalhsak an ni a, in kalh zingah hian MRB loan buainaa inhnamhnawiha puh PS Zatluanga chenna in pawh a tel.
Champhai DC Pu James Lalrinchhana chuan SARFAESI Act, 2001 hnuaiah Champhai khawpui chhunga loan rul tha lote mi 5 te laka dan kengkawh turin thupek a tichhuak a. Hemi bawhzui hian tun hnaiah an chenna in chu khawih chet theih lohvin kalhsak an ni a, an loan aiah hian an in-te hi lilam tura ruahman a ni a;Chenna in an kalhsak zingah hian Mizoram Rural Bank, Champhai Branch-a loan-a inbumna chungchanga inhnamhnawiha puh PS Zatluanga chenna in pawh kar hmasa khan kalhsak a ni.
Mizoram Rural Bank, Champhai Branch atang hian Kum 2021 khan kha tih laia manager khan KCC account-a mi chu mi 1290-te banck account hmangin Cheng Nuai 2161 a puk tir a, heta pawisa pukte hi Lucas Thangmangliana, PS Zatluanga, T Paulamthanga, Tuangzapaua leh Jacob Thanglianchinga-te accout-ah a lut tih hriat chhuah a ni a; Champhai leh Khawzawl District-a khaw hrang hrangah Self Help Group hmingin mi pakhatah KCC loan cheng nuai 2 zel pek chhuah a ni a. ‘Loan laknaa a hming tumtute chuan cheng nuai 1 leh sing 6 changin, a buaipuitute’n kut hah manah cheng sing 4 an hlawh thung ang’ tiin an inremsiam a. Loan latute hian sum an hmuh hmain bank atangin a thinna an dawn avangin Kum 2022 kum tir khan an mangang chuan Champhai Police Station-ah FIR an thehlut a, a mawhphurtua puh mi 4- te chu man an nih hnuah bail-a chhuah an ni a. Tunah an zinga pakhat chenna in chu DC thupek anga kalhsak a ni ta a ni A chenna in leh a chhunga bungraw awmte chu khawih chet theih lohva hren niin, in chhung bungrua erawh an kalh hma hian a lo thiar chhuak hman nia hriat a ni. He thubuai hi Police-te chuan charge sheet theh lut tawh mah se, Bank danah Bank sum chingpen chu CBI chhuitir tur tih a awm avangin MRB Chairman ngenna angin February thla laihawl vel khan Lokayukta chuan Centrel Bureau of Investigations (CBI) kutah he thil chhui hna hi an pe ta a ni.