Mizoram Rural Bank, Champhai Branch a KCC loan-a inbumna avangin ni 100 inhlawhna lak kawngah Job Card neitute leh VC te’n harsatna an tawk.
MRB Champhai Branch-a KCC loan inbumna, CBI te’n chhuichianna hmahruai an neiha account an hman zawng zawngte chu khawih chet theih lova hrensak an ni a. Heng account te hi tam takin MGNREGA (ni 100 inhlawhna) hlawh luhna atan an hman avangin harsatna a thleng tih Maipawl-in VC a biakpawhte chuan an sawi.
KCC loan inbumnaa account hren ber hi Champhai Bethel Vengah nia hriat a ni a. Champhai Bethel Veng VC te chuan tunah hian account khawih che theih loh 50 velah MGNREGA hlawh a lut thin a. An account hi kum 5 chhung atan hrensak niin Maipawl zawhna chhangin an sawi a.
KCC loan inbumnaa FIR luh tanna Hnahlan khuaah pawh account 10 chuang khawih chet theih lova buai a la awm mek a. Heng account te hi an hming paih a, an aiawha an chhungte hming leh account hmandan an zawn mek thu Hnahlan VC te chuan an sawi ve bawk.
A dawngtu turten hlawh an dawn theih loh piah lamah hmasawnna hnathawhna tur leh bawlhhlawh paihna thawhkhawm tur thlengin a nghawng nia hriat a ni.
MRB Champhai Branch a loan tihchingpennaa inhnhnawiha puh pakhat chu DC thupek angin a chenna in chhuhsak a lo ni tawh a. Hetihlai hian bank atanga loan la, rul tha duh lo midang pawh an chenna in khalhsak tura buaipui mek a la awm niin Champhai DC chuan a sawi ve bawk.