June 3, 2024 : Inrinni tlai thim hlima Vapar daia lirthei chetsualna thlengah mi 2 an thi.
Vapar VCP hnen atanga Maipawl thu dawn danin Mi 5 chuanna lirthei TATA 810 (Eight-Ten) meihawl phur hi Vapar atanga Champhai lam pana tlan chhuak a ni a, Vapar leh Ngur inkar Changpui ramah chesualin kawng thlangah a tlan liam a, metre 20 vel a lum a ni.
He chetsualna thlengah hian Lirthei khalhtu Thangkhansiama, kum 19, mi leh Pi Nemnghaihkimi, kum 52 mi Vapar khua ve ve-te chu a hmunah an thi nghal a, lirthei khalhtu Thangkhansiama hi motor-in a delh beh avangin a ruang hi lak chhuah lawk theih a ni lo a, zan dar 12 velah lak chhuah theih chauh a ni.
Lirtheia chuang ve dang mi 1 tih loh mi dang pahnihin hliam an tuar a, hliam tuar Mansianniangi leh Suanngaihmanga-te chu Champhai District Hospital panpui nghal an ni a, Mansianniangi hi a ngaihtuahawm lutuk lo a, Suanngaihmanga erawh chu enkawlna tha zawk dawng turin Aizawl lamah phurh thlak a ni thung.
Lirthei chetsualnaa thite ruang hi Champhai District Hospital-ah nimin khan Postmortem niin vuiliam an ni a, Hnahlan leh Hnahlan chhim veng, Murlen, Ngur leh Ngur vengsang atangin mi eng emaw zatin Vapar chhiat tawhnaah hian thlan an laihpui a ni.