Larsap Dr Hari Babu Kambhampati chuan .
Mizoram Legislative Assembly vawi 9-na First Session-ah vawiin khan Larsap Dr Hari Babu Kambhampati chuan thu sawiin Ministry thar hnuaiah Mizoram hmasawnna leh intodelhna atana hmalak dan tur tlang pui leh a hawi lam te a tarlang a; Larsap chuan General Election neih zawh tak, November 7, 2023-ah khan mipui tam tak an tel a, vote tla zat chu za zela 80.43 lai a ni chu Mizoram mipuite’n inthlan a hma aiin an ngaihven sawt a, an a rualawhna te hriatthiam pui thei ber tura ang ngaih, Sawrkar(Ministry) thlan kawngah an mawhphurhna pawimawh zia te an hre thar a, a lawmawm takzet a ni a ti.
Larsap chuan MLA thlan tlin te lawmpuina leh duhsakna a hlan a; hmeichhia MLA 3 thlan tlin chu Mizoram legislative history-ah a la awm ngai a nih thu a sawi a. Hei hi Mizorama hmeichhiate hlawhtlinna ropui tak a ni a. An hlawhtlinna hian state puma hmeichhiate tan phurna thar a pek ngei a rin thu a sawi bawk.
Inthlanna zalen leh felfai tak neih lehna kawngah, Larsap chuan Sawrkar hnathawkte, a bikin dan leh thupek kengkawhtute inpekna te bakah NGO leh Kohhran leh mipuite thlawpna a ropui tih a sawi a. People’s Forum (MPF) in hna an thawk tha tih a sawi a; Larsap chuan he Inthlan result hian mipuite’n system thar – ‘Kalphung Thar’ an duh a ni tih a tilang a, democracy kalphung inthlak danglamna kawngah kan mipuite rinna nghet tak a lantir tih a sawi bawk.
Larsap Dr Hari Babu Kambhampati chuan kum nga chhunga a Sawrkar-in a ngaih pawimawh tura mamawh zinga pawimawh zual paruk huam chhungah thapui thawhna tur kawng pasarih a awm tih sawiin Sawrkar tha, inrelbawlna tha tak hnuaia mipui tana hnathawk, langtlang leh innghahna tlak siam te, Sector zawng zawngah hmasawnna ngelnghet siam tura hmalakna te, Industry sector lama tanlak te, Mitin ban phaka social security chhawp leh khua leh tuite mamawhna ang zawn zeal hmalak te, Thalaite tana hamthatna leh hmasawnna buatsaih te, Kan chhehvel min hualtu boruak, thing leh mau, leilung, nungcha etc.(Environment ) venhim leh humhalh te, Khuarei thlenga kan chhawr tur leh hlawkpui tur hmasawnna ruhrel din a nih thu a sawi bawk.
Larsap thu sawi zawh hian ZPM member Lt. Col. Clement Lalhmingthanga, Champhai South bialtu chuan Larsap thusawi chungchangah lawmthu sawina motion a pu lut a, ZPM member Nl. Baryl Vanneihsangi, Aizawl South III bialtu in a thlawp a. Hemi hnu hian vawiin atana \hut khawm chu tih tawp a ni.