Champhai District Town Vending Committee chu an chairman Pu James Lalrinchhana, Champhai Bawrhsap kaihhruaina hnuaiah an thu khawm a, Champhai Vengthlang, Awmpui pheia Christmas Bazar siam chungchang an sawi ho a, Christmas Bazar hi December ni 15, 2023 atanga siam tan tura ruahman niin ni December ni 23,2023 thlenga siam tura ruahman a ni. Thu khawm chuan Vengthlang Presbyterian Biak In kawt atanga Bazar Pui chhohna Step thlenga in pho na hi siam turin a ruahman a, Bazar siam hun chhung hian Vengthlang North Presbyterian Biak In peng atanga Bazar pui Step inkarah lirthei eng chi pawh zing dar 10 atanga tlai dar 4 thleng tlan phal loh ni se an ti bawk.
Krismas Bazar-a thil zuar duh te chu India khua leh tui an ni ngei tur a ni a, December ni 13 chawhma dar 11 ah UD&PA Office, CHANEM ah seat a pawh tur a ni dawn a, Seat 1 man atan hian Rs 800 ruahman a ni, parking area pawt fuhte erawh chuan parking fee nitin an chawi tel thung dawn a ni. Seat lei tum ten Voter’s ID leh Passport size thlalak 1(pakhat) ken tel tur a ni. Mipui tam zawkin thil an zawrh theih nan mi pakhat in seat 1 bak lei tum lo turin Champhai District Town Vending Committee chuan mipuite a ngen a ni.