Euro 2020 khelh mekah Denmark leh Finland te inkhel chu minute 42-naah Denmark playmaker kum 29 mi Christian Eriksen-a nikhaw hre lova a tluk avangin tihtawp a ni. Eriksen hi damdawi in panpui a ni a, a harh thain a that leh thuai beisei a nih thu Denmark Football Team chuan an sawi.
Eriksen hi ball chhar a va tum chu a tlu a, bawihsawm a nih hnuah stadium atangin zawn chhuah nghal a ni. An zawn lai hian a harh tawh a, damdawi inah hian a dinhmun pawh ngaihtuahawmin a awm lo niin UEFA chuan thuchhuah siamin an tarlang a. Denmark leh Finland inkhel erawh tihtawp lailawk niin kalpui chhunzawm dan tur chu team hnihte leh match official te be rawn chunga rel a ni ang, tih UEFA chuan an sawi.