Ningani, June ni 1 zingkarah Kawlbem khawtlang hruaitute chuan Pu Daikhanlama, kum 43 mi, Kawlbema cheng chu Ngopa damdawi inah a thi tih thu an dawng a. Vuakhlum a ni tih chu an hriatdan a ni. Thawhlehni-ah Kawlbem Students Union chuan he thil thleng hi an demna thuchhuah an siam a, FIR thehluh a nih hnuah police te chuan an chhuizui mek.
Ningani khan Ngopa-a Ruihhlo Dotu Pawl chuan an khawtual mi pakhat hnen atangin ruihhlo an mansak a. A lakna an zawh chuan Pu Daikhanlama te ta an lak a nih thu leh, ruihhlo hi an hnen atang hlira an lak a nih thu a sawi. Helai tlangdunga chinchang hria mi hrang hrangte kan zawh chuan Daikhanlama hi ruihhlova sumdawng a nih thu an sawi hlawm.
Ruihhlo dotu Pawl committee hian a supply tu chhut chah a ngai, tiin an ruihhlo mansak hi tawktarah an hmang a, Daikhanlama nupui nena ruihhlo, number 4 hawng hnih an inpe lai chu an man a. A nupui hi thu an zawtfiah a, mahse engmah a sawi tha duh lo. Thu an inzawhfiahna kal zelah hian ruihhlo kawl dang an la nei ngei a nia an hriat avangin a pasal Pu Lama chu an ko veleh ta a. Tlai dar 5 velah khan Kawlbem atangin Ngopa-ah hian a fapa hruaiin an kal ta a.
An koh danah hian Kawlbem atanga thudawnnain a sawi danin a nupuiin Pu Daikhanlama hi a phone a, amah rawn khul chhuak turin pawisa te pawh keng turin a rawn ti niin an sawi a. Pu Lama nupui an kawl lai hian Kawlbem VCP chu lehlanga Ngopaa a awm lai a ni a. Tlai dar 3 velah Pu Lama nupui an man thu leh, pu Lama pawh thu zawhfiah atana koh an duh thu an hrilh a. Pu Lama an koh hnuah hian eng thil nge thleng zui ta zel tih chu an hre tawh lo tih Maipawl a hrilh.
Daikhanlama hi thu an zawhfiah a, an ruihhlo kawl chu a awmna hrilh turin an dawp a. A sawi that duh loh avangin indawpna atan hian tharum an hmang ta a. A hnua a ruang thlalak social media-a thehdarh atangin kut an thlak nual tih hmuh theih a ni. Hetihlai hian a nupui chuan no 4 hawng 13 an la kawl thu a sawi thung a. Chu chu han laksak nise tiin Ngopa atang hian Kawlbem an panpui ta a ni.
Kawlbem zirlai pawl chuan a nupui hi kut an thlakin a kaih a, a taksate a khawng phah a, hei bakah hian khuaah pawh dah lovin ramhnuai, Selam peng kawngpuiah an hnutchhiah tiin an thuchhuahah an tarlang a. A nupui hian lirthei a ruih nasat em avangin a chuang chhunzawm duh lova, midangin ruihhlo an dah chu a awmna an hriatpui tho avangin han la mai turin a chah ta nia sawm a awm a. Kawlbem VCP chuan hei hi Ngopa VCP hnena an dawn dan a nih thu leh, thudik nge a nih dik lo tih finfiah theih a nih loh thu min hrilh.
Kut an thlak chungchangah hian Kawlbem atanga thudawn danin a nupui hian a hnuah kut an thlak lova, mahse an thil tawnte chuan a khawih em avanga a taksa khawng a ni zawk tiin a sawi leh a. Thudawnna dang pawhin kut an thlak nia a lan loh thu a tarlang ve bawk. Kawlbem VCP chuan a nupui kut an thlak tel tia thuchhuah hi thuchiang an hriat hmaa chhuah a nih vang a nih a rin thu a sawi.
Ruihhlo an lak karah hian Pu Daikhanlama dinhmun chu a tha lo ta a, damdawi inah dahluh niin Zirtawpni zing lam dar 1 velah khan a boral a. A tuk zingah Ngopa khawtlang hruaitute chuan ngaihdam dil tur leh zualko turin Kawlbem an pan a, zing dar 6 rik hmain Pu Lama thih thu hi an va thlen a, a ruang erawh chu endiktu tur doctor a lo awm lova, an nghah avangin tlai lam dar 6 hnuah an khua an thlenpui thei ta chauh thung.
Pu Daikhanlama chhungte hian Ngopa Police Station-ah nimin, Ningani vek khan FIR an thehlut a, a thihna chu chhui chiang tur leh mawhphurtute chu dan anga hremna pe turin an ti a. A chhui hna chu Ngopa Police te hian an thawk mek. Ngopa OC chuan kan zawhna chhangin, pawikhawihtua man an la awm lova, a chhuina kal zel atangin pawikhawitute chu man an ni ang, a ti a, tunah chuan a ruang endikna, medical report an la nghak a, a thih chhan tak hi official-a puanzar a la awm lo. A ruang endikna hi zawhfel tawh ni mah se report tichhuak turin Aizawla thawn thlak a ngai a, result hi hriat theih a la ni ta rih lo.
Kawlbem YMA hruaitu kan biakpawh chuan, “Tun hi Ngopa kut kan tawrh vawikhatna a ni lova, a hmain kan khaw mi, bawngchaw zawng chu vuakhlum a lo ni tawh a. A nat chu ka na khawp mai. Kan hmalak leh kan kalzel dan tur chu kan la fel leh ang”, tiin a sawi a. Khaw pahnihte inhuatna chhuak thei zawngin thil kal lo se a duh tih a sawi a, he thubuai hi thlen a nih tawh avangin dan anga rorelna hlen chhuah ngei a beisei tih a tarlang. Kawlbem VCP pawhin, “Pu Lama thil tih hi a tha kan ti hauh lova, kan thlawp hek lo. Mahse nunna a chan erawh hi chu a pawi kan ti takzet a, kan tuar a ni.” a ti. Ngopa khawtlang hruaitute pawhin boruak a sosang ang tih hlauvin ngawih an chuh a. “Sawifiah ngai lai chu a awm nual mai, mahse tunah chuan engmah sawi chhuak lo turin kan kan inti a. Chuvangin thil awmdan sawifiah a remchang rih lo” tiin Maipawl a hrilh.