Kachin Independence Army (KIA) te chuan khawpui leh thingtlangah indona lian zawk chhuak thei reng a nih avangin mipuite chu inralringa awm turin an chah.
Hnam sipaite leh Myanmar sipaite hi ramhnuaiah an indo tlangpui a. Mahse sipai thuneihnaa kun duh loten ralthuam an chuh tak zel avangin indona mual chu a insawn zel a, khawpui leh thingtlang khuate chu indona hmunah a chhuak lovang tih sawi theih a ni lo tiin KIA thupuangtu chuan a sawi a. “Kan kaldanah hian tharum thawh lam kan awn zel avangin tute pawh inralrin a tul a ni.” a ti.
Hetihlai hian sipai duh lova ralthuam chuhtu, People’s Defence Force te chu hmun hrang hrangah an che zui zel a. Sagaing state-a Mingin khuaa an inkahnaah vawiin khan sipai 15 an thi a. Sipaite hian khua an beih hnuah PDF te hian an dolet niin an sawi a. PDF lamah hian mi 1 kahhlum a ni ve bawk.
Thawhlehni khan Mandalay-a PDF leh sipaite inkahnaah nunna chan an awm nual a. Thi zingah hian sipai Lt Col pawh a tel. Chin State lamah sipai hian CNF leh CDF tawngkawp chu an ep bawk. Hetiang boruak hi a nih avangin KIA thupuangtu chuan mipuite chu eitur lo chhekkhawl a, lo inralring turin a chah a ni.