Mizorama hrileng thawh hnihna kan tawrh nat ber lai kan tawng mek. June ni 8 chawhnu dar 1 thleng khan thi zat chu mi 57 an tling ta. Nunna chan zinga a tam zawk chu mipa niin mi 42 an ni a, hmeichhe thi zat chu mi 15 an ni. Integrated Disease Surveillance Project-in data a tihchhuah atanga a lan danin May ni 1 atanga June ni 8 thlenga thi zingah a upa ber chu kum 92 mi a ni a, a naupang ber chu kum 24 a ni.
Maipawl in zirchianna a neih danin thite kum chu chawhrualin kum 63 a ni a. Hmeichhia nunna chante kum chawhrual chu kum 63 leh a chanve a nih laiin mipa kum chawhrual chu kum 60 leh a chanve a ni ve thung.
Nunna chan zingah hian hri kaite enkawlna damdawi in, Zoram Medical College-a enkawl loh mi pahnih an awm a. Heng mite hi hri kai an ni tih an thih kaihhnawihah hriat chhuah chauh an ni. Damdawi ina enkawl zingah hian ni 31 an enkawl chu a rei ber a. Ni khat chauh enkawl hman mi pahnih an nei.
Natna dang – Cancer, zunthlum leh a dang neite chu hrikai an ni tih hmuh chhuah a nih atangin kar khat emaw a hmalamin damdawi ina dahluh an ngai deuh tlangpui a. An zinga a tam zawk ber chu kar hnih emaw chhung vel enkawl an nih hnuah an boral.
Natna nei lo leh thalai, hrisel pangngai nunna chan zirbingnaah pakhat chu mipa kum 24 mi chu hri a kai tih hmuh chhuah a nih hnuah ZMC-ah dahluh a ni a, ni 11 chhung ward pangngaia enkawl a nih hnuah ni 17 chhung ICU-ah enkawl zui leh a ni.
A tira symptoms nei lo, mahse an natna zual a, thihpuite chu kar hnih aia tam an dam lo tlangpui. RaTG hmanga hri kai an hmuh chhuah kum 40 a upa mipa chu a kai atanga ni 7 hnuah ZMC-ah dahluh niin ni 28 enkawl zui a ni a. RaTG-a hmuh chhuah vek hmeichhia kum 64 mi chu ni thum hnuah damdawi inah admit niin ni 13 hnuah a boral ve bawk. Natna dang nei lo he hripui thihpuite hi enkawl chhung a rei zawk tih zirchianna atanga hmuh chhuah a ni bawk a.
Nunna chan mi 57 te damdawi ina enkawl chhung hi chawhrualin ni 13 chhung a ni. Thi tam ber tum chu June ni 1 leh ni 4 te kha niin mi pali an thi a. June thla bikah hian ni 8 thleng chu nitin nunna chan an la awm ziah bawk.
Hetihlai hian vawiin khan Mizoramah hri kai thar mi 317 hmuh chhuah belh a ni a. Heng zinga mi 149 te chu mipa an ni a, mi 168 te chu hmeichhia an ni. Hri kai hi sample endik zat 3967 atanga hmuh chhuah niin mi 100 zelah mi 7.99 chu an positive a. Symptoms nei mi 231 an awm laiin a natna lang chhuak lo mi 86 an awm ve thung.