Congres Party chuan Home Minister Pu K Sapdanga’n Assembly House-a Champhai District jail-a tangte chungchang a sawi dan chuan rorelna laltiang lek tura quality a neih loh zia a tarlang chiang hle ni-a an ngaih thu an sawi.
Congress Party chuan Mizoram Budget Session neih mekah February ni 26, 2023-a Home Minister Pu K. Sapdanga’n, Champhai Jail chhiat dan chungchang a sawinaah, a bang atan rangva tun hmangin, Jail tang te zana nula rima an chhuah thin thu leh zan reia Jail-a an rawn hawn leh mai thin thu a sawi ta mai chu an ngai thutak hle tih sawiin Dan leh thupek (Law & Order) kengkawh ber tura ngaih Home Minister-in Jail tang mek, leng chhuak thin te thil tih dan pawmpui ang zawnga tawngkam a nei chu rorelna laltiang lek tura quality a neih loh zia a tarlang chiang hle ni-a an ngaih thu an sawi.
Congress party chuan Dan bawhchhiat avanga Jail tangte’n zana zalên taka nula an rim tih hre reng chunga hetiang tawngkam chhak chhuaktu Home Minister hian a hna a tlin loh zia leh a hlen loh zia a tarlang chiang hle ni-a sawiin Jail tang mekte mipui zinga zalen taka an leng thei chu mipui tan a him lo a ni tih hre chunga haidertu Home Minister Pu K. Sapdanga hian vanduaina thleng palh ta se, mawhphurhna ala ngam dawn lo tih a chiang ni-a an hriat thu an sawi bawk.
Congress party chuan Sorkar kal tawhte thiam taka sawisel thin politician te chu ram rorelna fawng chelh turin an that ber lohzia ZPM sorkar hotute thusawi leh thil tihah a rawn lang zel ni-a sawiin ‘Enchhin Sorkar’ an hrawn mek chu Mizoramin sorkar a neih tawh zinga laktlak loh ber leh rintlak loh ber a ni tih a lang chiang chho mek zel a. Mizoramin hetiang hun a hmachhawn mekah hian Congress party chuan mipuite tan he ‘Enchhin Sorkar’ hi a lipse zel dawn a ni an puang bawk a ni.